नेपाल– म्यानमार सिधा हवाई उडानमा सकारात्मक

काठमाडौं –  नेपाल म्यानमार उद्योग वाणिज्य सङ्घले नेपालका लागि गणतन्त्र म्यानमारका नवनियुक्त राजदूत म्यो मायन्ट मौङ्गको कार्यकाल सफलताको शुभकामना व्यक्त गर्दै स्वागत कार्यक्रम आयोजना गरेको छ ।

सोमबार काठमाडौँस्थित म्यानमारको राजदूतावासमा आयोजित भेटघाटमा सङ्घका अध्यक्ष शिवकुमार अग्रवालले नवनियुक्त राजदूत म्यो मायन्ट मौङ्गको कार्यकालमा द्विपक्षीय सम्बन्ध थप प्रगाढ हुने विश्वास व्यक्त गर्नुभयो ।

अध्यक्ष अग्रवालले सङ्घले विगत १३ वर्षदेखि द्विपक्षीय व्यापारका क्षेत्रमा पुर्‍याउँदै आएको योगदानको चर्चाा गर्दै राजदूत म्यो मायन्ट मौङ्गको कार्यकालमा नेपाल र म्यानमार बिच सिधा हवाई उडानको सुरुवात हुनसके यसमा कोशेढुंगा साबित हुने बताउनुभयो ।

म्यानमारमा ८० प्रतिशत बौद्ध धर्मावलम्बी रहेको स्मरण गराउँदै उहाँले बुद्ध जन्मस्थल लुम्बिनीमा म्यानमारबाट सिधा हवाई उडान व्यावसायिक रूपमा सम्भव रहेको धारणा राख्नुभयो । म्यानमारमा ठुलो सङ्ख्यामा रहेका नेपाली भाषीलाई पनि यसले सेवा प्रदान गर्नसक्ने उहाँको भनाइ थियो ।

नेपाल र म्यानमार बिचको व्यापारमा समस्याका रूपमा रहेको भुक्तानीको समस्यालाई नयाँ राजदूतको कार्यकालमा सहजीकरण हुने उहाँले विश्वास व्यक्त गर्नुभयो । नेपालले निर्यात गर्न सक्ने क्षेत्रमध्ये सफ्टवेयर, हस्तकला, उच्च मूल्यका कृषि उत्पादन, चिया, कफीलगायतको प्रवर्द्धन गर्नुपर्नेमा उहाँले जोड दिनुभयो ।

आउँदो वैशाखमा नेपाली प्रतिनिधिमण्डलले म्यानमारको भ्रमण गर्ने भएकाले यसमा पनि सहजीकरण गरिदिन उहाँले आग्रह गर्नुभयो ।

सो भेटका अवसरमा नेपालका लागि म्यानमारका राजदूत म्यो मायन्ट मौङ्गले नेपालप्रति म्यानमारको सरकार र जनताको सद्भाव रहेको उल्लेख गर्दै यसलाई थप प्रगाढ बनाउने बताउनुभयो ।

उहाँले द्विपक्षीय व्यापारमा देखिएका समस्या समाधान गर्ने तथा थप व्यवसाय विस्तारमा सहयोग गर्ने प्रतिबद्धता जनाउनुभयो ।

नेपालमा म्यानमारका पर्यटकको सङ्ख्या बढाउने सम्भावना रहेको उल्लेख गर्दै सिधा हवाई सेवालाई दिगो रूपमा अघि बढाउने आफ्नो योजना रहेको उहाँले सुनाउनुभयो  । यसका निमित्त पर्यटनसम्बन्धी प्याकेज कार्यक्रमको आवश्यकता रहेको उहाँले बताउनुभयो ।

पर्यटन प्रवर्द्धनका लागि दुवै मुलुकले डकुमेन्ट्री प्रदर्शन गरी एक आपसमा भ्रमण बढाउनुपर्ने उहाँको भनाइ छ । नेपाल म्यानमार चेम्बर अफ कमर्ससँग सहकार्य गरी म्यानमार चेम्बर अफ कमर्ससँग भाइचाराको सम्बन्ध विस्तार गरिने उहाँले प्रतिबद्धता जनाउनुभयो ।

राजदूतसँगको भेटमा सङ्घका अध्यक्ष अग्रवालसहित उपाध्यक्ष रतनलाल केडिया, कोषाध्यक्ष लक्ष्मीप्रसाद सुवेदी, कार्यसमिति सदस्य मोहनवीर थापा, ऋषिराज मोर, निर्मल पौडेल र राज लामा लगायत सहभागी हुनुहुन्थ्यो ।