पीएसबी: कानून र कर्मचारी समायोजनको विषय मुल प्राथमिकतामा

काठमाडौँ- सार्वजनिक सेवा प्रसारण संस्थामा नेपाल टेलिभिजन र रेडियो नेपाललाई रुपान्तरण गरेसँगै यसको मर्म र भावना बमोजिम काम अघि बढेका छन ।

सार्वजनिक सेवा प्रसारण नेपालका अध्यक्ष डा.महेन्द्र विष्टले पीएसबीको मर्म पुरा गर्न  परिणाम दिने गरी जनताकेन्द्रित विषयवस्तु उत्पादन गर्नतर्फ लाग्न दुबै निकायका संचारकर्मी र कर्मचारीहरुलाई सुझाव दिनुभएको छ।

नेपाल पत्रकार महासंघ रेडियो नेपाल शाखाको नव निर्वाचित कार्यसमितिलाई पदभार हस्तान्तरण कार्यक्रममा अध्यक्ष डा विष्टले पीएसबीसँग जोडिएका नियमावली, विनियमावली र कर्मचारी समायोजनका विषय समय सापेक्ष रुपमा दुवै निकायको हित हुनेगरी काम गर्न आफू प्रतिबद्ध रहेको र संचारकर्मीहरुले पनि कार्यशैलीमा सुधार गरी परिणाममुखी काम गर्न आग्रह गर्नुभयो ।

कार्यक्रममा नेपाल पत्रकार महासङ्घकी अध्यक्ष निर्मला शर्माले पीएसवीलाई मुल भावना अनुसार अगाडि लैजाने र विषयवस्तु उत्पादनसँगै श्रमको सुरक्षा, सम्मान र श्रमजिवीको हकहितमा सहकार्य गरेर अगाडि बढ्न महासङ्घ तयार रहेको बताउनुभयो ।।