नेपाल नाइट : स्विजरल्याण्डका पर्यटकहरूलाई नेपाल भ्रमणको निम्तो

 काठमाडौँ –  नेपाल पर्यटन बोर्ड र संयुक्त राष्ट्र सङ्घका लागि नेपाल स्थायी मिसन, जेनेभाको सहकार्यमा जेनेभामा आयोजित “नेपाल नाइट” मा स्विजरल्याण्डका पर्यटकहरूलाई नेपाल भ्रमणका लागि आग्रह गरिएको छ ।

जेनेभामा सोमबार सम्पन्न ‘नेपाल नाइट’ को अवसरमा संस्कृति, पर्यटन तथा नागरिक उड्डयन मन्त्रालयका सचिव एवं नेपाल पर्यटन बोर्डका अध्यक्ष विनोद प्रकाश सिंहले नेपालका प्राकृतिक सौन्दर्य, सांस्कृतिक विविधता, साहसिक पर्यटनका अवसरहरू तथा नेपाली आतिथ्य संस्कृतिको विशेषता प्रस्तुत गर्दै स्विजरल्याण्डका पर्यटकहरूलाई नेपाल भ्रमण गर्न आह्वान गर्नुभयो । सचिव सिंहले नेपाल र स्विजरल्याण्डकाबीच सन् १९५६ देखि कायम कूटनीतिक सम्बन्धको चर्चा गर्दै यी दुई देशका भौगोलिक समानताहरू र स्विजरल्याण्डले नेपालको पूर्वाधार, प्रविधि तथा पर्यटन प्रवर्द्धनमा पुर्‍याएको योगदानलाई पनि स्मरण गर्नुभयो । उहाँले प्रसिद्ध स्विस भूगर्भविद् तथा अन्वेषक डा. टोनी ह्यागेनले नेपाललाई विश्वसामु चिनाउन गरेको योगदानको उच्च प्रशंसासमेत गर्नुभयो । उहाँले स्विजरल्याण्डका यात्रा व्यवसायी तथा सञ्चारकर्मीलाई नेपाललाई प्रमुख पर्यटकीय गन्तव्यका रूपमा प्रवर्द्धन गर्न आग्रहसमेत गर्नुभयो ।

‘ नेपाल पर्यटन बोर्डका वरिष्ठ प्रबन्धक खड्गविक्रम शाहले नेपालको पर्यटकीय विविधता, रमणीय भू-दृश्य, पर्यटनका नयाँ पहल तथा नीति सम्बन्धी विस्तृत प्रस्तुति दिनुभयो ।

पर्यटन विभागका महानिर्देशक डा. नारायण प्रसाद रेग्मीले नेपालमा थप स्विस पर्यटक तथा लगानीकर्ताहरूलाई स्वागत गर्न नेपाल पूर्ण रूपमा तयार रहेको जानकारी गराउनुभयो ।

कार्यक्रमको संयोजन नेपाल पर्यटन बोर्डका वरिष्ठ अधिकृत कुन्दन शर्मा मिश्राले गर्नुभएको थियो ।

कार्यक्रममा सहभागीमध्येबाट एक जनालाई ७-दिनको नेपाल भ्रमणका लागि लक्की ड्र गराइएको थियो । जसमा संयुक्त राष्ट्रसङ्घ कार्यालय तथा अन्य अन्तर्राष्ट्रिय संस्थाहरूका लागि रुसी स्थायी प्रतिनिधि गेन्‍नादी गाटिलोभले उक्त लक्की ड्र जित्नुभएको छ। स्विजरल्याण्ड र आसपासका क्षेत्रहरूमा नेपालको पर्यटन उपस्थिति बढाउने उद्देश्यका साथ आयोजित यस कार्यक्रमले नेपाललाई आकर्षक पर्यटकीय गन्तव्यका रूपमा प्रवर्द्धन गर्ने महत्त्वपूर्ण अवसर भएको बोर्डले जनाएको छ । कार्यक्रममा विभिन्न मुलुकका कूटनीतिज्ञ, सरकारी अधिकारी, यात्रा व्यवसायी, सञ्चारकर्मी तथा पर्यटन क्षेत्रका सरोकारवालाहरूसहित करिब ६० विशिष्ट व्यक्तित्वहरूको सहभागिता रहेको थियो ।

नेपालका लागि संयुक्त राष्ट्रसङ्घ स्थायी प्रतिनिधि रामप्रसाद सुवेदीले स्वागत मन्तव्य दिँदै नेपालको पर्यटन क्षमताका बारेमा जानकारी गराउनुभएको थियो ।