दैलेख-१ बाट नेपाली काँग्रेसकी बासना थापा विजयी
दैलेख- दैलेख क्षेत्र नं १ मा नेपाली कांग्रेसकी उम्मेदवार बासना थापा प्रतिनिधिसभा सदस्यमा विजयी हुनुभएको छ ।
बिहीबार सम्पन्न प्रतिनिधिसभा सदस्य निर्वाचनको अन्तिम मत परिणामअनुसार थापा १२ हजार ३७२ मत प्राप्त गरी निर्वाचित हुनुभएको हो ।
उहाँका निकटतम प्रतिद्वन्द्वी नेकपा (एमाले)का उम्मेदवार रबीन्द्रराज शर्माले ११ हजार ७९६ मत प्राप्त गर्नुभएको छ ।
दैलेख सदरमुकाममा रहेको होटेल पार्किङकी सञ्चालक बासना २०७४ सालमा नारायण नगरपालिकाको उपप्रमुखमा पराजित हुनुभएको थियो ।
नेविसंघको राजनीतिबाट होमिनुभउकी थापा नेपाली सिने जगत्की लोकप्रिय नायिका विपना थापाकी बहिनी हुनुहुन्छ ।
विगतमा कांग्रेसले दैलेखमा गरेको विकासलाई नै आफ्नो चुनावी एजेन्डा बनाएर चुनावी मैदानमा उत्रिएकी बासनाले १२ बर्षपछि नेपाली काँग्रेसको झण्डा दैलेख-१ मा फहराउन सफल हुनुभएको हो ।
यो निर्वाचनमा अहिलेसम्म विजयी भएका काँग्रेसका उमेदवारमध्ये बासना एकमात्र विजयी महिला हुनुहुन्छ ।।
प्रतिक्रिया राख्नुहोस्