जुम्लाबाट राप्रपाका ज्ञानबहादुर शाही विजयी

काठमाडौँ- प्रतिनिधिसभा सदस्य निर्वाचन अन्तरर्गत जुम्लामा राष्ट्रिय प्रजातन्त्र पार्टी (राप्रपा) का उम्मेदवार ज्ञानेन्द्र शाही १४ हजार ८१६ मतसहित विजयी हुनुभएको छ ।

शाही नेपाली कम्युनिस्ट पार्टीका उम्मेदवार नरेश भण्डारीसँग तीन हजार १८१ मतान्तरसहित निर्वाचित हुनुभएको हो ।

यहाँ नेकपाका भण्डारीले ११ हजार ६३५ मत प्राप्त गर्नुभएको थियो ।

नवनिर्वाचित सांसद शाही राष्ट्रिय प्रजातन्त्र पार्टी (राप्रपा) का प्रवक्तासमेत हुनुहुन्छ ।

२०४८ साल माघ २४ गते जुम्लाको सिङ्जा गाउँपालिका वडा नम्बर ३ पिगीमा जन्मनुभएका शाही विशेषतः सामाजिक सञ्जालमा सुशासनका मुद्दा उठाएर राजनीतिमा आउनु भएको हो ।

शाहीले आफुलाई भ्रष्टाचार विरोधी अभियन्ताको रुपमा परिचय बनाउनु भएको छ ।

जुम्लाको दुर्गम भेगमा जन्मिनु भएका शाहीले एसएलसीपछि काठमाडौँको त्रिचन्द्र कलेजमा विज्ञान विषय पढ्नु भएको थियो ।

त्रिचन्द्रबाट आईएस्सी पढेपछि सीए पढ्नका लागि भारतको राजधानी दिल्ली जानुभएको थियो ।

जुम्लामा शाहीको यो लगातार दोस्रो जित हो ।

यस अघि २०७९ सालमा पनि उहाँ जुम्लाबाट प्रतिनिधि सभा सदस्य निर्वाचित हुनु भएको थियो ।

अघिल्लो प्रतिनिधि सभामा शाही राप्रपाको सचेतकसमेत हुनुहुन्थ्यो ।।