देशका विभिन्न स्थानमा शुक्रबारसम्म मुसलधारे पानी पर्ने, सतर्क रहन आग्रह

काठमाडौँ- अबका दुई दिन देशको पहाडी तथा तराई भेगका कतिपय स्थानमा मुसलधारे पानी पर्ने सम्भावना रहेको मौसम पुर्वानुमान महाशाखाले जनाएको छ ।

जल तथा मौसम विज्ञान विभाग, मौसम पूर्वानुमान महाशाखाले जारी गरेको मौसम सम्बन्धी पछिल्लो जानकारी अनुसार भोलिसम्म देशका विभिन्न स्थान विशेषगरी कोशी, बागमती, गण्डकी र कर्णाली प्रदेशका पहाडी तथा हिमाली भूभागमा ठूलो पानी पर्ने संभावना छ ।

कतिपय स्थानमा भिषण पानी पर्ने सम्भावना रहेकोले नदी किनार वरपर र पहिरोको जोखिम रहेको स्थानमा बसोवास गर्नेहरुले आवश्यक सावधानी अपनाउन मौसम विभागले आग्रह गरेको छ ।

महाशाखाले पछिल्लो २४ घण्टामा सबैभन्दा बढी वर्षा सिन्धुपाल्चोक जिल्लामा ९७ दशमलव २ मिलिमिटर मापन भएको जनाएको छ ।

महाशाखाका अनुसार दोलखाको लामाबगरमा ८१ दशमलव ४ मिलिमिटर वर्षा भएको छ ।

पछिल्लो २४ घण्टामा मुख्यतः पहाडी क्षेत्रमा उल्लेख्य वर्षा भएको तथा मधेस, लुम्बिनी र सुदूरपश्चिम प्रदेशका तराई क्षेत्रमा तुलनात्मक रूपमा कम वर्षा भएको पनि महाशाखाले जानकारी दिएको छ ।।