पर्सा राष्ट्रिय निकुञ्जमा मात्र चार वर्षमा ३० वटा बाघ थपिए

बारा- पर्सा राष्ट्रिय निकुञ्जमा बाघ संरक्षण प्रयासको महत्वपूर्ण उपलब्धि चार बर्षमा ३० बाघ थपिएका छन् ।

सन् २०२२ को सर्वेक्षणमा ४१ वटा बाघ रहेको पर्सा राष्ट्रिय निकुञ्जमा यसपटक राष्ट्रिय बाघ सर्वेक्षण-२०२६ को नतिजा

अनुसार ७१ वटा बाघ अभिलेखिकरण भएका छन ।

यससँगै चार वर्षको अवधिमा पर्सा राष्ट्रिय निकुञ्जमा ३० वटा बाघ थपिएका हुन ।

राष्ट्रिय निकुञ्ज तथा वन्यजन्तु संरक्षण विभागले सार्वजनिक गरेको प्रतिवेदन अनुसार पर्सा, चितवन, बाँके, बर्दिया र शुक्लाफाँटा राष्ट्रिय निकुञ्ज तथा आसपासका वन क्षेत्रमा गरिएको वैज्ञानिक सर्वेक्षणबाट नेपालमा हाल कुल ४२९ वटा पाटे बाघ रहेको अनुमान गरिएको छ ।

बासस्थान संरक्षण, चोरी–सिकारी नियन्त्रण, आहारा प्रजातिको संरक्षण तथा स्थानीय समुदाय र युवाहरुको सकृय भुमिकाले सकारात्मक परिणाम दिएको पर्सा राष्ट्रियका सुचना अधिकारी सन्तोष भगतले जानकारी दिनु भएको छ ।

उहाँले बाघ लगायतका जनावरका लागि पानी कमी हुन नदिन ३० वटा कृतिम र ७ वटा प्राकृतिक पोखरी निमार्ण, घाँसे मैदान ब्यबस्थापन लगायका संरक्षणमा भएको कामका कारण बाघ १८ बाट ४१ र हाल ७१ पुग्न सफल भएको बताउनु भयो ।

सर्वेक्षणका लागि पर्सा-चितवन, बाँके–बर्दिया र शुक्लाफाँटा–लालझाडी गरी तीनवटा संरक्षण क्षेत्र (कम्प्लेक्स) मा हजारौं स्वचालित क्यामेरा जडान गरी वैज्ञानिक विधिबाट बाघको गणना गरिएको थियो।

बाघको संख्या बढेसगै सुरक्षित बासस्थान, मानव–बाघ द्वन्द्व न्यूनीकरण र जैविक मार्गको संरक्षणमा थप ध्यान दिनुपर्ने सुचना अधिकारी भगतले बताउनु भएको छ ।

पर्सा राष्ट्रिय निकुज्जमा बाघको संख्या बढेसँगै निकुन्जमा आवश्यक प्राकृतिक बासस्थान, पर्याप्त आहारा र सुरक्षित वातावरण रहेको देखिएको छ ।

त्यसो त चितवन–पर्सा जैविक मार्ग (बायोलोजिकल करिडोर)ले बाघको आवागमन र प्रजननमा महत्वपूर्ण भूमिका खेलेको भगतले बताउनु भएको छ ।

पछिल्ला वर्षहरूमा सामुदायिक वन उपभोक्ता समूह र स्थानीय बासिन्दासँगको सहकार्यले मानव-वन्यजन्तु द्वन्द्व न्यूनीकरणमा समेत सहयोग पुगेको निकुञ्जले जनाएको छ ।।