नेपाल टेलिकम र नेपाल टेलिभिजनबीच सहकार्य हुने

काठमाडौँ- नेपाल टेलिकम र सार्वजनिक सेवा प्रसारण, नेपाल टेलिभिजनबीच सहकार्य गर्ने सम्झौता भएको छ ।

आम नागरिकलाई प्रभावकारी टेलिकम सेवा र विश्वसनीय सूचना तथा समाचार सेवा प्रवाह गर्न टेलिकम र नेपाल टेलिभिजनबीच सहकार्य सम्बन्धी सम्झौता पत्रमा हस्ताक्षर भएको हो।

आर्थिक वर्ष २०८३/८४ का लागि गरिएको सम्झौताले राज्य मातहतका दुवै संस्थाले नागरिकलाई प्रदान गर्ने सेवा, सूचना र समाचारलाई थप प्रभावकारी बनाउने विश्वास गरिएको छ ।

सम्झौतामा नेपाल टेलिकमका तर्फबाट प्रवन्ध निर्देशक संगीता पहाडी अर्याल र सार्वजनिक सेवा प्रसारण नेपाल टेलिभिजनका तर्फबाट कामु प्रमुख प्रशासकीय अधिकृत आरती चटौतले हस्ताक्षर गर्नुभयो ।

कार्यक्रममा सार्वजनिक सेवा प्रसारण नेपालका कार्यवाहक अध्यक्ष उर्वशी बस्न्यातले नेपालको दूरसञ्चार संस्था र आम सञ्चारका अग्रणी संस्थाहरुबीचको सहकार्यले सूचना र दूरसञ्चार सेवा प्रवाह तथा विस्तारलाई थप प्रभावकारी बनाउने बताउनुभयो ।

नेपाल टेलिकमका प्रबन्ध निर्देशक संगीता पहाडी अर्यालले नागरिकमा प्रभावकारी पहुँच राख्ने नेपाल टलिभिजनसँगको सहकार्यले टेलिकमको प्रवर्द्धन र विस्तारमा सहयोग पुग्ने विश्वास व्यक्त गर्नुभयो ।

सार्वजनिक सेवा प्रसारण नेपालका कामु प्रमुख प्रशासकीय अधिकृत आरती चटौतले राज्य मातहतका दुवै संस्थाले सेवा प्रवाह र व्यापकताका लागि आफ्ना भौतिक पूर्वाधारहरुमा समेत साझेदारी विस्तार गर्न सके राज्य नै लाभान्वित हुन सक्ने धारणा राख्नुभयो ।।