पोखरीमा डुबेको कारबाट दुई जनाको शव निकालियो

सर्लाही- सर्लाहीको ईश्वरपुर नगरपालिका-२, भक्तिपुर मियाँखोरमा पोखरीमा डुबेको कारबाट दुई जनाको शव निकालिएको छ ।

मियाँखोरस्थित सडक छेउमा रहेको सरस्वती माध्यमिक विद्यालयको पोखरीमा बयलवासबाट महोत्तरीको गौशालातर्फ जाँदै गरेको कार अनियन्त्रित भई खस्दा कार चालक गौशाला नगरपालिका-२, महोत्तरीका ३७ वर्षीय सुरेश महतो र कारमा सवार सोनमा गाउँपालिका-८, महोत्तरीका ३७ वर्षीय रामाकान्त ठाकुर बेपत्ता भएका थिए ।

बेपत्ता महतो र ठाकुरलाई पोखरीभित्र डुबेको कारबाट मृत अवस्थामा बाहिर निकालिएको इलाका प्रहरी कार्यालय केशरगन्ज, बयलवासका प्रहरी निरीक्षक उमाकान्त जोशीले जानकारी दिनुभयो ।

सशस्त्र प्रहरी बल नेपालको बर्दिबासस्थित छिन्नमस्ता बाहिनीबाट गएको गोताखोर टोलीले पानीमा डुबेको कारबाट दुवै जनाको शव निकालेको हो ।

मृतक दुवैको शव घटनास्थलको प्रकृति मुचुल्का गरी पोस्टमार्टमका लागि प्रादेशिक अस्पताल मलङ्गवा पठाउने तयारी भइरहेको प्रहरी निरीक्षक जोशीले बताउनुभयो ।

कारमा सवार ३१ वर्षीय जनक यादव भने सकुशल बाहिर निस्कन सफल भएको प्रहरीले जनाएको छ ।