कर्णालीको उत्पादनमूलक क्षेत्रमा लगानी गर्न राष्ट्र बैङ्कका गभर्नर पौडेलको सुझाव

सुर्खेत –  नेपाल राष्ट्र बैङ्कका गभर्नर प्रा. डा. विश्वनाथ पौडेलले बैङ्क तथा वित्तीय संस्थाहरूलाई कर्णालीमा उत्पादनमूलक क्षेत्रमा लगानी गर्न सुझाव दिनु भएको छ ।

राष्ट्र बैङ्क सुर्खेत कार्यालयले आज वीरेन्द्रनगरमा आयोजना गरेको बैङ्क तथा वित्तीय संस्था तथा उद्योगी÷व्यवसायी प्रतिनिधिहरूसँग भएको अन्तरक्रिया कार्यक्रममा गभर्नर पौडेलले अनुत्पादक क्षेत्रमा लगानीभन्दा पनि दिगो आर्थिक वृद्धि हासिल गर्न सकिने उत्पादनशील क्षेत्रमा लगानी गर्न आग्रह गर्नु भएको हो ।

उहाँले आयात प्रतिस्थापन गर्नका लागि उत्पादन वृद्धि गर्नुको विकल्प नभएकाले मूल्य श्रृखला विकासलक्षित लगानीलाई प्राथमिकता दिन सुझाव दिनु भयो ।

राष्ट्र बैङ्कले लिने नीति समग्र अर्थतन्त्रको विकासका लागि हुने भएकाले कर्णालीको आवश्यकतालाई पहिचान गरी लगानी गर्न बैङ्क तथा वित्तीय संस्थालाई उहाँले सुझाव दिनु भयो । कार्यक्रममा राष्ट्र बैङ्कका कार्यकारी निर्देशक रोशनकुमार सिग्देलले बैङ्क तथा वित्तीय संस्थाको लगानी कर्णालीको औद्योगिक तथा उत्पादनमूलक क्षेत्रमा बढाउनुपर्नेमा जोड दिनु भयो ।

कर्णालीको औद्योगिक एवं उत्पादनमूलक क्षेत्र लगानी अभावमा समस्यामा पर्न नहुने उहाँको भनाइ थियो ।

छलफलमा उद्योगी÷व्यवसायीहरूले कृषि क्षेत्रमा ऋण सहुलियत हुनुपर्ने, दीर्घकालीन कार्य योजना सहित आर्थिक विकास मात्र नभई सामाजिक–आर्थिक विकासलाई जोड्नुपर्ने औँल्याउनु भयो ।

यता बैक तथा वित्तीय संस्थाका प्रतिनिधिहरूले भने कर्णालीमा निजी क्षेत्रले ब्याजदर कम हुँदा कुनै योजना नबनाउने तर ब्याजदर बढी भए लगानी गर्न पाएनौँ भन्ने गुनासो गर्ने प्रवृत्ति रहेको बताउनु भयो ।

कार्यक्रममा राष्ट्र बैङ्कका कार्यकारी निर्देशक किरण पण्डित, नेपाल उद्योग वाणिज्य महासङ्घ कर्णाली प्रदेशका अध्यक्ष पदमबहादुर शाही, सुर्खेत उद्योग वाणिज्य सङ्घका अध्यक्ष हर्षविक्रम खड्का, सुर्खेत चेम्बर अफ कमर्सका अध्यक्ष चिन्तामणि शर्मा, नेपाल बिमा प्राधिकरण कर्णाली प्रदेश प्रमुख निल प्रसाद लामिछाने, नेपाल बैंकर्स सङ्घ कर्णाली च्याप्टरका संयोजक सुरोज टण्डन, राष्ट्र बैङ्क सुर्खेतका निर्देशक शरणकुमार अधिकारीलगायतको सहभागिता रहेको थियो ।