धेरै कर तिर्ने करदाताहरू सम्मानित

नुवाकोट –गत आर्थिक वर्षमा सबैभन्दा धेरै कर तिर्ने करदाताहरू सम्मानित भएका छन् । नुवाकोट र धादिङका करदाता सम्मानित भएका हुन् ।

राष्ट्रिय कर दिवसका अवसरमा आन्तरिक राजश्व कार्यालय गल्छीले गत आव २०८०÷०८१ मा नुवाकोट र छिमेकी धादिङ जिल्लाबाट सबैभन्दा धेरै कर तिर्ने करदाताहरूलाई सम्मान गरेको हो । कार्यालयले सोमवार कार्यक्रमसहित दुई जिल्लाबाट गत आवमा धेरै कर तिर्ने एक÷एक जना करदातालाई सम्मानित गरेको हो ।

नुवाकोट, धादिङ र रसुवाको करदाता सम्बन्धी कार्य आन्तरिक राजश्व कार्यालय गल्छीमार्फत हुँदै आएको छ । कर प्रणालीको सार, लगानीको आधार भन्ने मूल नाराका साथ राष्ट्रिय कर दिवसको अवसरमा नुवाकोटबाट सबैभन्दा बढी आयकर तिर्ने त्रिशूली बिर्डिङ्ग एन्ड रिसर्च फार्म प्रा.लीका सञ्चालक विष्णुप्रसाद रिमाल र धादिङको आर्जित कन्स्ट्रक्सन अम्बिका खड्कालाई आन्तरिक राजश्व कार्यालय गल्छीका प्रमुख प्रेमप्रकाश शाही, नुवाकोट उद्योग वाणिज्य सङ्घका अध्यक्ष राजेन्द्र श्रेष्ठ, धादिङ उद्योग वाणिज्य सङ्घका अध्यक्ष रामकुमार डल्लाकोटीलगायतले सम्मानित गर्नुभएको हो ।

सम्मानित दुवै करदातालाई सम्मान पत्र र दोसल्ला ओढाएर सम्मानित गरिएको हो  । कर तिरेर सभ्य करदाताको रूपमा प्रस्तुत हुनु करदाताको कर्तव्यसमेत भएको कार्यक्रमका सहभागीहरूले बताउनु भयो।

आयकर तिर्नु सरकारको अभियानमा साथ दिनु र कानुन अनुसार सफल व्यवसाय गरेको जनाउँदै  गत वर्ष धेरै कर दाखिला गरेका रिमाल र खड्कालाई सम्मान गरिएको आन्तरिक राजश्व कार्यालय गल्छीका प्रमुख प्रेमप्रकाश शाहीले बताउनु भयो । सरकारले हरेक वर्ष कर दिवसका अवसरमा बढी कर तिर्ने करदातालाई सम्मान गर्दै आएको छ ।