तारजाली र सीसी क्यामेराको निगरानीमा सिन्धुलीको मतगणना स्थल

अनिल भण्डारी, सिन्धुली- सिन्धुलीमा तार जाली र सीसी क्यामेराको निगरानीमा हुने गरि मतगणना स्थल तयार पारिएको छ । मतदान भएकै दिन मतपेटिका मुख्य निर्वाचन अधिकृतको कार्यालयमा आइपुग्ने गरि तयारी भएको र मतगणनास्थल समेत तयार पारिएको मुख्य निर्वाचन अधिकृतको कार्यालयले जनाएको छ ।

निर्वाचनको तिब्र तयारीसँगै मतगणना स्थलको समेत तयारीलाई तिब्रता दिइएको हो । दुई निर्वाचन क्षेत्र रहेको सिन्धुलीमा माथिल्लो तल्लामा २ नम्बर क्षेत्रको र भुई तल्लामा निर्वाचन क्षेत्र नम्बर १ को मतगणना हुने गरि मुख्य निर्वाचन अधिकृतको र निर्वाचन अधिकृतको कार्यालय रहेको भवनमा तयार पारिएको छ । कडा सुरक्षा सहित मतगणनास्थल रहने गरि तयारीलाई तिब्रता दिइएको हो ।

यहि फागुन २१ गते हुने प्रतिनिधि सभा २०८२ को निर्वाचनका लागि सिन्धुलीमा मतपत्र सहित निर्वाचन सामाग्री तयारी अवस्थामा राखिएको र मतदानकेन्द्र तर्फ पठाउने तयारी अन्तिम चरणमा पुगिसकेको कार्यालयले जनाएको छ । मतदान अधिकृत र सहायक मतदान अधिकृतलाई तालिम दिइसकिएको र निर्वाचन स्थलमा खटाइने करिब १६ सय बढी कर्मचारीलाई नियुक्ति पत्र दिएर मतदान केन्द्रतर्फ पठाउने तयारी अन्तिम चरणमा पुगेको मुख्य निर्वाचन अधिकृत कमलराज विष्टले जानकारी दिनुभयो ।

२१ गते रातिनै मतपेटिका मुख्य निर्वाचन अधिकृतको कार्यालयमा आइसक्ने गरि तयारी गरिएको र मतगणनास्थलको तयारीलाई समेत तिब्रता दिइएको हो । तारजाली सहितको व्यवस्था गरेर सीसी क्यामेराको निगरानीमा रहनेगरि मतगणनास्थल तयारी बनाइएको मुख्य निर्वाचन अधिकृत विष्टले जानकारी दिनुभयो ।

उम्मेदवारहरु मत माग्न मतदाताका घरघरमा जाने क्रमलाई तिब्रता दिइरहँदा यता निर्वाचनका सम्पूर्ण तयारीका चरणहरु पुरा हुँदै गएको सम्बन्धित निकायले जनाएको छ । मतपत्र सहित निर्वाचनका लागि आवश्यक पर्ने सबै सामाग्रीहरु आइसकेको र १७ गतेदेखि मतदानकेन्द्रतर्फ पठाईने कार्यालयले जनाएको छ । मतदानकेन्द्रमा सुरक्षा निकायले निगरानीलाई उच्च बनाएको सुरक्षा निकायले जनाएका छन् ।

जिल्लामा नेपाली सेना, सशस्त्र प्रहरी नेपाल प्रहरी राष्टिय अनुसन्धान तथा निर्वाचन प्रहरी गरि ३५ सयभन्दा बढी सुरक्षाकर्मी परिचालन हुने र आवश्यक स्थानमा सुरक्षाकर्मी पुगिसकेको प्रमुख जिल्ला अधिकारी स्किम श्रेष्ठले बताउनुभयो । उहाँका अनुसार एकिकृत सुरक्षा योजना अनुसार सबै सुरक्षा निकाय निर्वाचनको सुरक्षामा खटिएको प्रजिअ श्रेष्ठले जानकारी दिनुभयो । उहाँले निस्पक्ष निर्वाचन र शान्तिपुर्ण निर्वाचन गराउन सुरक्षा निकाय प्रतिवद्ध रहेकाले ढुक्कले मतदान गर्न मतदातालाई आह्वान समेत गर्नभयो । दुई निर्वाचन क्षेत्र रहेको सिन्धुलीमा नेपाली काँग्रेस, नेकपा एमाले, नेपाली कम्युनिष्ट पार्टी र राष्ट्रिय स्वतन्त्र पार्टीबीच मुख्य प्रतिस्पर्धा हुने मतदाताहरुको बुझाई छ । दुई निर्वाचन क्षेत्र रहेको सिन्धुलीमा ६ जना स्वतन्त्र सहित २८ जनाले उम्मेदवारी दिनुभएको छ ।