सुनकोसीमा खसेको कार र यात्रुको अवस्था अझै अज्ञात

सिन्धुली- सिन्धुलीको फिक्कल गाउँपालिका–२, नवलपुरस्थित मध्यपहाडी राजमार्गमा बसको ठक्करपछि सुनकोसी नदीमा खसेर बेपत्ता भएका यात्रुहरुको अवस्था अझै अज्ञात छ। खोलामा खसेको कारसमेत पत्ता लगाउन सकिएको छैन ।

नदीमा पानीको उच्च बहावका कारण खोजी कार्य चुनौतीपूर्ण बनेको र हालसम्म फेला पार्न नसकिएको जिल्ला प्रहरी कार्यालय सिन्धुलीले जनाएको छ ।

सोमबार काठमाडौँबाट ओखलढुंगातर्फ जाँदै गरेको बा.प्र. ०८–००१ ख ०१४४ नम्बरको बसले सडक छेउमा रोकिएको प्रदेश ३–०१–०२४ च ९५७३ नम्बरको कारलाई ठक्कर दिँदा कार करिब ५० फिट तल सुनकोसी नदीमा खसेको थियो ।

दुर्घटनामा सिन्धुपाल्चोक जुगल गाउँपालिका–७ का ३९ वर्षीय निर्माण व्यवसायी दिलकुमार लामा, सिन्धुली गोलन्जोर गाउँपालिका–१ का २८ वर्षीय गणेश थापा र तीनपाटन गाउँपालिका–९ का १७ वर्षीय सुजन बलम्पाकी मगर बेपत्ता भएका छन् ।

जिल्ला प्रहरी कार्यालय सिन्धुलीका प्रमुख प्रहरी उपरिक्षक रविन्द्रबहादुर सिंहका अनुसार सशस्त्र प्रहरी बलको विपद् व्यवस्थापन बेस क्याम्प खुर्कोटको गोताखोर टोली, नेपाल प्रहरी तथा स्थानीयवासीको सहयोगमा खोजी कार्य निरन्तर भइरहेको छ ।

मंगलबारदेखि ड्रोन र म्याग्नेटसहितका आधुनिक उपकरण प्रयोग गरी खोजीलाई थप तीव्र बनाइएको भएपनि फेला पार्न नसकिएको प्रहरीले जनाएको छ ।

नदीको उच्च बहाव र तीव्र करेन्टका कारण उद्धार तथा खोजी कार्यमा कठिनाइ भइरहेको प्रमुख जिल्ला अधिकारी स्किम श्रेष्ठले जानकारी दिनुभयो ।

उहाँका अनुसार बुधबार १५ सदस्यीय गोताखोर टोलीले दुई वटा डुङ्गाको प्रयोग गरी नवलपुरदेखि घुर्मीसम्मका विभिन्न सम्भावित क्षेत्रमा खोजी कार्य जारी राखेको थियो ।

दुर्घटनामा संलग्न बसका चालक फिक्कल गाउँपालिका–६ का २६ वर्षीय हेमबहादुर तामाङलाई प्रहरीले नियन्त्रणमा लिएर घटनाबारे थप अनुसन्धान गरिरहेको छ ।

यता, पीडित परिवार र स्थानीयवासीले उचित क्षतिपूर्ति तथा जिम्मेवार पक्षसँग वार्ताको माग गर्दै खुर्कोट–घुर्मी सडकखण्डमा लगातार तीन दिन देखि अवरुद्ध गर्दै आएका छन् ।

बस धनी र यातायात व्यवसायीसँग छलफल भइरहेको र सडक सञ्चालनको प्रयास भइरहेको प्रजिअ श्रेष्ठले जानकारी दिनुभयो ।।