“नो अब्जेक्शन सर्टिफिकेट” अनलाइनबाट दिने निर्णय कार्यान्वयनमा आएन

काठमाडौं- नेपालबाट विदेशमा अध्ययन गर्न जाने विद्यार्थीको संख्या अघिल्लो बर्षको तुलनामा यो बर्ष आधाले घटेको छ ।
विद्यार्थीलाई विदेशमा अध्ययन गर्न जाने अनुमति पत्र लिन सजिलो होस् भन्ने उदेश्यले अनलाईनबाटै आवेदन दिने प्रणाली सरकारले अघि बढाएको भएपनि अनलाईन प्रणाली शुरु हुन भने सकेको छैन ।

आर्थिक बर्ष ०७५/०७६ मा ६३ हजार विद्यार्थीले विदेशमा अध्ययन गर्नका लागि अनुमति पत्र लिएकोमा गत आर्थिक बर्षमा ३३ हजारले मात्र यस्तो अनुमति पत्र लिएका थिए ।
विश्वभर फैलिएको कोरोना १९ को महामारीका कारण विदेशमा अध्ययन गर्न जाने विद्यार्थीको संख्या घटेको भनाई शैक्षिक परामर्शकर्ताको छ ।
साथै अन्तर्राष्ट्रिय उडान पुनः शुरु गर्ने भएपछी विदेशमा अध्ययन गर्न जाने अनुमति पनि दिनुपर्ने धारणा परामर्शकर्ताको छ ।

विगतमा दैनिक करिव ५ सय जना विद्यार्थीले अनुमति पत्र लिने गरेकोमा गत बर्षको फागुन १९ गतेदेखि त्यस्तो अनुमति दिने कार्य बन्द छ ।
लकडाउनको घोषणा भएपछि नयाँ विद्यार्थीलाई अनुमति पत्र नदिइए पनि विदेशमै रहेका र कलेज अथवा विषय परिवर्तन गर्न चाहने वा माथिल्लो तहमा अध्ययन गर्न चाहनेका लागि भने यस्तो पत्र दिने काम जारी छ । यस अवधिमा ८८ जनाले यस्तो पत्र लिएका छन् । यसैबीच विदेशमा अध्ययन गर्न जाने अनुमतिपत्र अथवा नो अब्जेक्शन सर्टिफीकेट अनलाईनबाट दिने निर्णय शिक्षा विज्ञान तथा प्रविधि मन्त्रालयले गरेको छ ।
तर घोषणा भएको एक साता सम्म पनि यसको कार्यान्वयन भने हुन सकेको छैन ।
अनलाईन प्रणाली कार्यान्वयन भएमा आफ्नै ठाउँबाट विद्यार्थीले सहज रुपमा अनुमति पत्रकालागि आवेदन दिन सक्ने छन् ।।