पोखरामा फोहोरमैला व्यवस्थापनमा चुनौती

कास्की- पोखरा महानगरपालिकालाई स्मार्ट सिटी बनाउने भनिएपनि आजकल यो दिनप्रतिदिन दुर्गन्धित बन्दै गइरहेको छ ।

महानगर क्षेत्र भित्र फोहोरमैला तथा सडक पशु चौपायको राम्रोसँग व्यवस्थापन नहुदाँ यो समस्या दिनप्रतिदिन बढ्दो छ । जसकारण शहर नै कतिपय अवस्थामा कुरुप देखिने गरेको छ ।

आजकल विहानी समयमा शहरका मुख्य चोकका सडममा यत्रतत्र फोहोर फालिएको तथा छाँडा पशु चौपायले उक्त फोहोर खोतल्दै खाँदै गरेको र छिरलेको देख्न सकिन्छ । जसकारण दिनप्रतिदिन पोखरा शहर दुर्गन्धीत बन्दै गएको छ ।

विशेषगरी पोखराको मुख्य बजार चिप्लेढुङगा, न्यूरोड, महेन्द्रपुल, नयाँबजार, सभागृहचोक, पृथ्वीचोक लगायतका स्थानमा यो समस्या बढी मात्रामा देखिएको हो ।

महानगरपालिकाका प्रवक्ता धनबहादुर नेपालीले स्थानीयले रातको समयमा सडकमा ल्याई जथाभावी फोहोर फाल्दा त्यसको व्यवस्थामा समस्या भइरहेकोे बताउनुभयो । महानगरले फोहोर फाल्ने गाडीमा मात्रै फोहोरमैलाको व्यवस्थापन गर्नु भनेको छ , तर स्थानीयले भने त्यसको पूर्ण कार्यान्वयन नगरेको उहाँले जनाउनुभयो ।

यता स्थानीयले भने फोहोरमैला व्यवस्थापनका लागि महानगरपालिकाले समयसमयमा गाडी उपलब्ध गराउनु पर्ने बताएका छन् ।।