रुस र युक्रेनबीच पाँचौ चरणको शान्ति वार्ता

रुस र युक्रेन बीच युद्ध शुरु भएको २० औं दिनमा पाँथो चरणको शान्ति वार्ता शुरु भएको छ । युक्रेनी र रूसी प्रतिनिधिमण्डलबीच हिजो पुनः शान्ति वार्ता सुरू भएको स्थानीय सञ्चारमाध्यमहरुले पुष्टि गरेका छन् । युक्रेनी र रूसी प्रतिनिधिमण्डलले सोमबार भिडियो लिङ्क मार्फत् छलफल सुरु गरेका हुन् ।

रुसी आक्रमणका कारण युक्रेनको राजधानी किभ सहित कयौं शहरहरु क्षतिग्रस्त भएका छन् । राजधानी किभ खतरनाक अवस्थामा रहेको भन्दै त्यहाँका मेयरले ३५ घण्टाका लागि कर्फ्युको घोषणा गर्नुभएको छ ।

किभमा सुरक्षा खतरा हुँदाहुँदै पनि तीन युरोपेली देशका प्रधानमन्त्रीले जोखिम मोलेर रेल मार्ग हुँदै युक्रेनी राष्ट्रपति भोलोदिमिर जेलेन्स्कीसंग राजधानी किभमा भेटवार्ता गर्नुभएको छ । पोल्याण्ड, स्लोभेनिया र चेक रिपब्लिकका प्रधानमन्त्री हिजै किभ पुग्नु भएको हो ।

हवाई मार्गबाट यात्रा गर्दा रुसी सेनाको निसानामा पर्न सक्ने भन्दै तीन जना प्रधानमन्त्रीले रेलमार्गबाट जाने निर्णय गर्नुभएको हो । युद्धले पीडामा रहेका युक्रेनी र त्यहाँका राष्ट्रपतिलाई नैतिक रुपमा समर्थन र साथ दिन तीन युरोपेली देशका प्रधानमन्त्रीले जोखिमपूर्ण यात्रा गर्नुभएको हो ।।