हिमपहिरोमा बेपत्ता तीन जनाको शव फेला

दार्चुला- दार्चुलाको ब्याँस गाउँपालिका–१ भोलिङमा खसेको हिमपहिरोमा बेपत्ता भएका तीन जनाको शव फेला परेको छ । बेपत्ता भएका ५ जना मध्ये ३ जनाको शव फेला परेको जिल्ला प्रहरी कार्यालय दार्चुलाले जनाएको छ ।

उनीहरु बसेको ठाउँभन्दा करिब पाँच सय मिटर तल शव फेला परेका हुन् । दार्चुलाको दुहुँ गाउँपालिका–४ पोक्सेका ३८ वर्षीया महिला कमला कुँवर उहाँका १८ वर्षीय छोरा प्रवीण कुँवर र डोटीको जोरायल गाउँपालिकाकी नक्की डोल्मा थापाको शव भेटिएको जिल्ला प्रहरी कार्यालय दार्चुलाका सूचना अधिकारी ज्ञानेन्द्र बहादुर सिंहले बताउनुभयो ।

उनीहरुको शवलाई अप्ठ्यारो भीरबाट नेपाल प्रहरी र सशस्त्र प्रहरीले निकालेको थियो । अन्य बेपत्ता २ जनाको शव फेला पार्न नसकिएको जनाइएको छ ।

यार्सागुम्बा टिप्न गएका दार्चुलाको दुहुँ गाउँपालिकाका ३८ वर्षीया कमला कुँवर उहाँका १८ वर्षीय छोरा प्रवीण कुँवर, डोटीको जोरायल गाउँपालिकाका ४५ वर्षीया नक्नी डोल्मा थापा, २८ वर्षीया ईश्वरी थापा र १५ वर्षीया थिमी सोमो थापा मंगलवार हिमपहिरोमा परी बेपत्ता भएका थिए । मंगलबार दिउँसोबाट सशस्त्रको टोली उद्धार तथा खोजीमा खटिएको भए पनि लगातारको हिमपात र वर्षाका कारण कठिनाइ भइरहेको छ ।