म आफ्नो नियमित काममा काठमाडौँमा नै छु : डा राणा

काठमाडौँ- नेपाली कांग्रेसकी केन्द्रीय सदस्य आरजु राणा देउवाले आफू भागेर सिंगापुर पुगेको भन्ने हल्लाको खण्डन गर्नुभएको छ ।

उहाँले आफू आज नियमित काममा काठमाडौँमा नै रहेको नेपालटिभीअनलाइनलाई जानकारी दिनुभयो ।

आफू पार्टी र केही पारिवारिक कामको सिलसिलामा नेपालका विभिन्न भागमा व्यस्त रहँदा रहँदै विदेश भागेको भन्ने हल्लाले स्वतन्त्र पत्रकारिताप्रतिको आम मानिसको विश्वास गुम्दै गएको राणाले बताउनुभयो ।

सामाजिक सञ्जालमार्फत आफ्नो विरुद्दमा केहीदिन यता विभिन्न विषयहरु सार्वजनिक भएको घटनाले आफूलाई दुखित बनाएको भएपनि निस्वार्थ जनताको पक्षमा काम गर्ने आफ्नो प्रतिवद्दतामा कुनै कमी नआउने उहाँको भनाइ थियो ।

हिजो विरगञ्ज र हेटौंडाका कार्यक्रमहरुमा सहभागी भएर राति काठमाडौँ फर्किएको उहाँले जानकारी दिनुभयो ।

राणा हिजो नेपाली काँग्रेसका नेता अजय चौरसियाको छोराको विवाह समारोहमा भाग लिन वीरगञ्ज  पुग्नुभएको थियो ।

त्यस क्रममा उहाँले हिजै हेटौंडामा एउटा मार्टको उद्घाटन गर्नुभएको थियो ।

त्यसैगरी हेटौंडामै राणाले महिला सशक्तीकरणका लागि प्रदेश सरकारको भूमिका विषयक अन्तरक्रियामा सम्बोधन गर्नुभएको थियो ।।