१२०१ जना कोरोना संक्रमित थपिए

काठमाडौं– पछिल्लो २४ घण्टामा थप १२०१ जना कोरोना भाइरस (कोभिड) संक्रमित थपिएका छन् ।

देशभरका प्रयोगशालामा १०१७६ जनाको पीसीआर परीक्षण गर्दा १२०१ जनामा कोरोना भाइरस संक्रमण पुष्टि भएको स्वास्थ्य तथा जनसंख्या मन्त्रालयको नियमित प्रेस ब्रिफिङमा शनिबार प्रवक्ता प्रा.डा. जागेश्वर गौतमले जानकारी दिनुभयो ।

बितेको २४ घण्टामा ८५२ जना डिस्चार्ज भएका छन् । अहिलेसम्म डिस्चार्ज हुनेको संख्या ३७५२४ रहेको छ । संक्रमितमध्ये ७० दशमलव ६ प्रतिशत निको भएका छन् ।

२४ घण्टामा थप १४ जनाको कोरोना संक्रमणबाट मृत्यु

पछिल्लो २४ घण्टामा थप १४ जनाको कोरोना संक्रमणबाट मृत्यु भएको छ । मृत्यु हुनेमा ३ जना महिला र ११ जना पुरुष रहेका छन् ।

स्वास्थ्य तथा जनसंख्या मन्त्रालयका अनुसार सुनसरीमा एक, पर्सामा एक, काठमाडौंमा तीन, भक्तपुरमा दुई, चितवनमा एक, तनहुँमा एक, स्याङ्जा, गोरखा र कास्कीमा एक–एक तथा रुपन्देहीमा दुई जनाको मृत्यु भएको छ ।

योसँगै नेपालमा कोरोना भाइरसबाट मृत्यु हुनेको संख्या ३३६ पुगेको स्वास्थ्य तथा जनसंख्या मन्त्रालयले जनाएको छ ।