गौतम बुद्ध अन्तर्राष्ट्रिय क्रिकेट रंगशाला निर्माणकाे ७० प्रतिशत खर्च बागमती प्रदेश सरकारले बेहोर्ने

मकवानपुर – गौतम बुद्ध अन्तर्राष्ट्रिय क्रिकेट रंगशाला निर्माणका लागि बागमती प्रदेश सरकारले बजेटको स्रोत सुनिश्चित गरेको छ । मंगलबार बिहान बसेको प्रदेश सरकारको बैठकले रंगशाला निर्माणका लागि प्रदेश सरकारले बेहोर्ने ७० प्रतिशत रकमको श्रोत सुनिश्चित गर्ने निर्णय गरेको हो । रङ्गशाला निर्माणका लागि भरतपुर महानगरपालिका र प्रदेश सरकारले लगानी सम्झौता गरेका थिए । सम्झौता अनुसार लागत अनुमानको ७० प्रतिशत प्रदेश सरकारले बेहोर्नेछ ।

क्रिकेट रंगशाला निर्माणका लागि भरतपुर महानगरपालिकाले पेश गरेको ७५ करोड रुपैयाँ मध्ये प्रदेशले बेहोर्ने ५२ करोड ५० लाख रुपैयाँको स्रोत सुनिश्चितत गरिएको मुख्यमन्त्री शालिकराम जम्कट्टेलले बताउनुभयो । बैठकले रंगशाला निर्माणका लागि ठेक्का प्रक्रिया अघि बढाउन भरतपुर महानगरपालिकालाई आग्रह समेत गरेको छ ।

यसैगरी मन्त्रीपरिषद् बैठकले राष्ट्रिय योजना आयोगको माग अनुसार संघीय समपुरक र विशेष अनुदानको लागि १०–१० वटा योजना सिफारिस गर्ने निर्णय गरेको छ । अघिल्लो आर्थिक वर्षमा निर्माण कार्य सम्पन्न भएको तर भुक्तानी गर्न बाँकी रकमहरु भुक्तानी गर्ने निर्णय भएको मुख्यमन्त्री जम्कट्टेलले जानकारी दिनुभयो । मुख्यमन्त्री जम्कट्टेलले केही प्रक्रियाहरु पुरा गर्नुपरेको कारण निर्माण कार्यको भुक्तानी गर्न ढिलाई भएको बताउनुभयो ।

युस्तै बागमती प्रदेश सरकारले फागुनको दोश्रो साता हिउँदे अधिवेशन बोलाउने तयारी गरेको पनि मुखयमन्त्रीले जानकारी गराउनुभयो । कांग्रेसको महासमिति बैठक र माओवादी केन्द्रको विधान अधिवेशन रहेकोले फागुनको दोश्रो हप्ता मात्र अधिवेशन बोलाउने तयारी गरेको उहाँले बताउनुभयो ।।