कोभिड-१९ नियन्त्रणमा सहकार्य गर्दै नेपाल टेलिभिजन

काठमाडौं- नेपाल टेलिभिजन राष्ट्रिय प्रसारणबाट दैनिक प्रसारण भैरहेको “कोभिड हटलाइन”  र सूचनामूलक बिशेष कार्यक्रम निर्माण तथा प्रसारणमा सहकार्यका लागि नेपाल टेलिभिजन र नेपाल दूरसञ्चार प्राधिकरणबीच सम्झौता भएको छ ।

नेपाल दूरसञ्चार प्राधिकरणमा आयोजित समारोहमा नेपाल टेलिभिजनका कार्यकारी अध्यक्ष डाक्टर महेन्द्र बिष्ट र प्राधिकरणका अध्यक्ष पुरुषोत्तम खनालले सम्झौता पत्रमा हस्ताक्षर गर्नुभयो । सम्झौता अवधी करिब एक बर्ष रहने छ। दुबै संस्थाहरुको सहकार्यमा निर्माण तथा प्रसारण हुने कोभिड हटलाइन कार्यक्रममा कोभिड- १९ सम्बन्धी दर्शकका प्रश्न र सम्बन्धित निकायबाट प्राप्त जवाफ तत्काल उपलब्ध गराइनेछ ।

यसैगरी कार्यक्रमहरुको अघि-पछि जनचेतनामूलक सन्देशहरु प्रसारण गरिनेछन । सम्झौतापछि नेपाल टेलिभिजनका कार्यकारी अध्यक्ष डाक्टर बिष्टले दुवै संस्थाहरु बीचको सहकार्य कोभिड- १९ महामारी नियन्त्रणमा फलदायी हुने बिश्वास ब्यक्त गर्नुभयो ।

प्राधिकरणका अध्यक्ष खनालले जनचेतना बिकासमा नेपाल टेलिभिजनले पुर्‍याउँदै आएको योगदानको सराह्नना गर्दै दुई सँस्थाबीचको सहकार्य उपयोगी रहँदै आएको उल्लेख गर्नुभयो ।।