सजिलो होला छायानाथ दर्शन गर्न ?

मुगु- विकास र प्रचार प्रसारको अभावमा सदियौदेखि ओझेलमा पर्दै आएको कर्णाली प्रदेशकै प्रमुख धार्मिक तिर्थस्थल मुगु जिल्लास्थित छायानाथको विस्तारै भौतिक पूर्वाधारको विकास हुन थाले पछि यसको चर्चा र महत्व फैलिन थालेको छ ।

समुन्द्र सतहदेखि ४ हजार ८ सय मिटरको उचाइमा अवस्थित छायानाथ तिर्थस्थल अरुबेला हिउँ जम्ने भएकाले जनै पुर्णिमाको अवसरमा श्रावण शुक्लपक्षको पञ्चमीदेखि पुर्णिमासम्म तिर्थालुहरु दर्शनका लागि आउने गर्छन ।

मुगु जिल्लाको छायानाथ रारा नगरपालिका –२, चैन गाँउमा मुल मन्दिर र मुगुम कार्मारोङ्ग गाँउ पालिकामा –१, डोल्फुमा तिर्थस्थल भएका कारण दुवै स्थानीय तहको साझा सरोकार भएपनि कठिन भूगोल र विकट क्षेत्र भएका कारण विकासमापछि परेको स्थानीयको भनाइ छ ।

छायानाथमा यस बर्ष भने मुगुम कार्मारोङ्ग गाँउ पालिकाले अफ्ठेरो ठाँउमा बाटो निर्माणका साथै र भगवान शिव र बुध्दका प्रतिमा स्थापना गरेपछि छायानाथकोआकर्षण बढनुका साथै तिर्थालुहरुलार्इ सहज हुने भएको छ ।

छायानाथ रारा नगरपालिका प्रमुख हरीजंग शाहीले समेत यसै बर्ष १० किलोको शिव पार्वतीको पित्तलको ढलोट मुर्ति मन्दिर भित्र स्थापना गरेपछि छायानाथ साँच्चै छायानाथ बनेको छ ।

छायानाथको ठोस विकास गरी धार्मीक पर्यटक भित्र्याउन विभिन्न कार्यक्रम लागु गर्न आफुहरु तल्लिन रहको दुर्इटै स्थानीय निकाय प्रमुखले बताउनु भएको छ ।

गमगढीदेखि छायानाथ पुग्ने पदमार्ग स्तर उन्नती गर्नुका साथै बाटामा सुविधायुक्त होटल र छायानाथमा व्यवस्थित धर्मशाला निर्माण गर्ने हो भने धार्मिक पर्यटकको आगमनले स्थानीयवासीलार्इ आय आर्जनको अवसर मिल्ने जानकारहरु बताउँछन ।।