प्याज खेतीबाट १५ लाख आम्दानी
पाँचथर- पाँचथर जिल्लाको फिदिम नगपालिका वडा नम्बर ११ का सुमन न्यौपानेले गतबर्ष १० ग्राम प्याजको बिउ छरेर प्याज खेती शुरु गरेका थिए ।
परिक्षणको रुपमा एउटा गह्रोमा प्याज खेती गरेका सुमनले यसबर्ष प्याजबाट १५ लाख बराबरको आम्दानी लिन सफल भए ।
जिल्लाका किसानहरु धेरैले आफैले खानको लागि मात्र भनेर थोरै प्याज खेती गर्दै आएका छन् तर बिकी गर्ने गरी प्याज उत्पादन गर्ने सुमन भने जिल्लाकै एक्लो कृषक हुन ।
एक किलो प्याजको बिउ खरिद गरी यसबर्ष सात रोपनी जमिनमा प्याज रोप्नका लागि एक लाख मात्र खर्च भएको थियो । त्यही प्याजबाट पन्ध्र लाख मुल्य बराबरको प्याज उत्पादन गरेको न्यौपानेको भनाइ छ ।
राम्रो आम्दानी लिन सकिने भन्दै उनले यसबर्ष ११ केजी प्याजको बिउ खरिद गरी २५ रोपनीमा खेती लगाउने सुरसार गरेका छन् ।
उनको यो लोभलाग्दो आम्दानी देखेर यस क्षेत्रका अन्य किसानलाई धान खेती मासेर प्याज लगाउने उत्प्रेणा मिलेको छ ।
यस क्षेत्रलाई प्याजको हब बनाउन यहाँका किसान उत्साहित भएकाछन् ।
खेती गर्न सजिलो र राम्रो मुल्य समेत पाउन सकिने भएपछि यसबर्षदेखि प्याज खेतीमा प्राबिधिक सहयोग र अनुदान दिने कृषि ज्ञान केन्द्रका निमित्त प्रमुख सागर बिष्टले जानकारी दिनुभएको छ ।
प्याज खेतीयोग्य जमिन भएकोले जिल्लाको बिभिन्न स्थानमा सिँचाइ सुबिधायुक्त क्षेत्रमा प्याज खेती लगाउने अभियान सुर भएको छ ।
स्वरोजगारको रुपमा नयाँ खेती अपनाउदै प्याजको आत्मनिर्भर जिल्ला बनाउने गरी उत्पादनमा किसान जुटेका छन ।।
प्रतिक्रिया राख्नुहोस्