बैंकहरुले औद्योगिक क्षेत्रमा प्रवाह गर्ने कर्जा वृद्धि

काठमाडौं- बैंक तथा वित्तीय संस्थाहरुले औद्योगिक क्षेत्रमा प्रवाह गर्ने कर्जा वृद्धि भएको छ ।

गत पुषसम्म औद्योगिक कर्जा १७.३ प्रतिशतले बढेर १० खर्ब ६२ अर्ब ४० करोड रुपैयाँ पुगेको छ ।

२०७६ सालको असार मसान्तसम्म बैंक तथा वित्तीय संस्थाले औद्योगिक क्षेत्रमा प्रवाह गरेको कर्जा गत वर्षको सोही अवधीको तुलनामा १२.६ प्रतिशतले बढेको थियो ।

यो रकम बैंक तथा वित्तीय संस्थाले गरेको ऋण लगानी मात्र हो । उद्योगीले गरेको २० देखि ३० प्रतिशत स्वपुँजी (इक्विटी) यसमा समावेश गरिएको छैन ।

उद्योगीले खर्बौं रुपैयाँ इक्विटी लगानी गरेका छन । बैंकहरुले प्रवाह गरेको कुल कर्जामध्ये औद्योगिक क्षेत्रको अंश ३३.९ प्रतिशत रहेको छ । बाँकी ६६.१ प्रतिशत कृषि, पर्यटन र पूर्वाधारमा लगानी रहेको छ ।

औद्योगिक कर्जामध्ये खानी सम्बन्धी उद्योगमा ०.७ प्रतिशत, कृषि, वन तथा पेय पदार्थ सम्बन्धी उद्योगमा १५.९ प्रतिशत, गैर–खाद्य वस्तु उत्पादन सम्बन्धी उद्योगमा ३५.३ प्रतिशत, निर्माण सम्बन्धी उद्योगमा ३१.४ प्रतिशत छ । यस्तै विद्युत ग्याँस तथा पानी सम्बन्धी उद्योगमा १२.९ प्रतिशत प्रवाह भएको नेपाल राष्ट्र बैंकले जनाएको छ  ।

औद्योगिक कर्जामध्ये प्रदेश १ मा ११.७ प्रतिशत, प्रदेश २ मा ८.३ प्रतिशत, बागमती प्रदेशमा ६३.५ प्रतिशत, गण्डकी प्रदेशमा ४.७ प्रतिशत, प्रदेश ५ मा ९.५ प्रतिशत, कर्णाली प्रदेशमा ०.५ प्रतिशत र सुदूर–पश्चिम प्रदेशमा १.८ प्रतिशत रहेको छ ।

यो तथ्याङ्क कोरोना भाइरस महामारी हुनु अघिको हो । महामारी नियन्त्रणका लागि सरकारले जारी गरेको बन्दाबन्दी (लकडाउन) र निषेधज्ञापछि बैंक तथा वित्तीय संस्थाको कर्जा विस्तार प्राय: ठप्प जस्तै छ ।

कर्जा विस्तार नभएपछि प्रणालीमा अझै पनि २ खर्ब रुपैयाँ अधिक तरलता रहेको केन्द्रीय बैंकले जनाएको छ । तर अहिले विस्तारै कर्जा लगानी हुन थालेको बैंकहरुले जानकारी दिएका छन ।।