फ्लोर क्रस गर्ने तीन जना पुनः मन्त्री, बागमती प्रदेशमा पनि मन्त्रिपरिषद् विस्तार

काठमाडौं– फ्लोर क्रस गर्ने तत्कालिन तीन सांसद पुनः मन्त्री भएका छन् ।

कर्णाली प्रदेशका मुख्यमन्त्री महेन्द्रबहादुर शाहीको सिफारिसमा नन्दसिंह बुढा, अम्मरबहादुर थापा र कुर्मराज शाहीलाई प्रदेश प्रमुख गोविन्द कलौनीले पद तथा गोपनीयताको सपथ गराउनुभएको छ । बुढा उद्योग, पर्यटन, वन तथा वातावरण, थापा भौतिक पूर्वाधार विकास र कुर्मराज शाही भूमि व्यवस्था कृषि तथा सहकारी मन्त्री बनाइएको छ ।

एमालेबाट निर्वाचित बुढा, थापा, शाही र प्रकाश ज्वालाले फ्लोर क्रस गर्दै माओवादी केन्द्रका शाहीको सरकार जोगाइदिएका थिए ।

यसैबीच बागमती प्रदेशका मुख्यमन्त्री डोरमणि पौडेलले मन्त्रिपरिषद् विस्तार गर्नुभएको छ । विस्तारित मन्त्रिपरिषदमा आन्तरिक मामिला तथा कानूनमन्त्रीको जिम्मेवारी केशव पाण्डेलाई दिइएको छ । उद्योग, वन, पर्यटन तथा वातावरण मन्त्रीमा सरेश नेपाल, सामाजिक विकास मन्त्रीमा सरस्वती बस्नेत र सामाजिक विकास राज्यमन्त्रीमा डा. रामकुमार अधिकारीलाई नियुक्त गरिएको छ । उहाँहरुको आजै शपथ भएको छ ।

माओवादी केन्द्र र माधव नेपाल समूहका मन्त्रीहरुले राजीनामा दिएपछि ती मन्त्रालय रिक्त थियो ।