राष्ट्रिय सभाबाट ‘विनियोजन विधेयक-२०७८’ पारित
काठमाडौँ- राष्ट्रिय सभाबाट विनियोजन विधेयक-२०७८ पारित भएको छ ।
नेकपा एमालेका सांसदहरुले विरोध गरेपनि बैठकबाट बहुमतले विधेयक पारित भएको हो ।
एमालेले आफ्ना माग पुरा नभएको भन्दै संसदका दुबै सदनका बैठकहरुमा विरोध जनाउँदै आएको छ । प्रतिनिधि सभाबाट सो विधेयक यसअघीनै पारित भएको थियो । पार्टीले कारवाही गरेका १४ जना सांसदलाई पदमुक्त गर्नुपर्ने माग प्रमुख प्रतिपक्षी दल नेकपा एमालेले गर्दै आएको छ ।
राष्ट्रिय सभाको अर्को बैठक असोज ८ गते शुक्रबार ११ बजे बस्ने कार्यक्रम छ ।
यसैगरी, आजै बसेको प्रतिनिधि सभाको बैठकले आर्थिक विधेयक २०७८ र राष्ट्र ऋण उठाउने विधेयक बहुमतले पारित गरेको छ । सभाको बैठक शुरु हुनासाथ एमालेका सांसदहरुले रोष्ट्रम घेराउ गर्दै नाराबाजी गरेका थिए ।
सभामुखले सांसदहरुलाई आआफ्नो ठाउँमा बस्न आग्रह गरेपनि सांसदहरुले नाराबाजी जारी राखेपछि बैठकको काम कारवाही अगाडि बढेको थियो ।
बैठकमा अर्थमन्त्री जर्नादन शर्माले ती दुबै विधेयक पारित गरियोस् भन्ने प्रस्ताव सभामा पेश गर्नुभएको थियो ।।
प्रतिक्रिया राख्नुहोस्