महाधिवेशनस्थलमै पुगेर प्रधानमन्त्रीद्वारा एमाले महाधिवेशन सफलताको शुभकामना व्यक्त

चितवन– प्रधानमन्त्री एवं नेपाली कांग्रेसका सभापति शेरबहादुर देउवाले महाधिवेशनस्थलमै पुगेर एमाले महाधिवेशन सफलताको शुभकामना व्यक्त गर्नुभएको छ ।

प्रधानमन्त्री देउवा र एमाले अध्यक्ष केपी शर्मा ओलीबीच ६ महिनापछि सार्वजनिक कार्यक्रममा भेट भएको हो ।

एमालेको १०औं राष्ट्रिय महाधिवेशनको उदघाटन समारोहलाई सम्बोधन गर्ने क्रममा प्रधानमन्त्री देउवाले हिजो ओलीलगायत धेरै वामपन्थी साथीहरू सँगै जेलमा बसेको स्मरण गर्दै त्यस्तो सम्बन्ध भएकाले लोकतन्त्र संस्थागत गर्न एमालेलाई आग्रह गर्नुभयो ।

‘सरकार निरन्तर संवाद र छलफलबाट हरेक समस्याको समाधान निकाल्न चाहन्छ । मुलुक कोभिडको महामारीका बेला सबै नागरिकलाई खोप दिनु आवश्यक थियो । विभिन्न मित्रराष्ट्रबाट प्राप्त सहयोगका लागि धन्यवाद दिन्छौं । कोभिड न्यूनीकरण भएको छ । आर्थिक अवस्था राम्रो हुँदै गएको छ,’ प्रधानमन्त्री देउवाले भन्नुभयो ।