गाउँपालिकाको केन्द्रमा खानेपानी सुविधा पुगेपछि स्थानीयमा खुशीयाली

गोरखा – गाऊँमा खानेपानी सुविधा पुगेपछि गोरखाको ताकुकोट गाऊँका बासिन्दाले नाचगान गर्दै खुशीयाली मनाएका छन् । वारपाक सुलिकोट गाऊँपालिकाको केन्द्र ताकुकोटमा घरघरमै खानेपानी सुविधा पुगेको हो । स्थानीय भुत्तेधारा खानेपानी योजनाको उद्घाटनका क्रममा गाऊँपालिकाका अध्यक्ष सहितका जनप्रतिनिधि र उपभोक्ताले बाजागाजा बजाउँदै नाचगान गरेर आपसमा खुशी साँटेका हुन् । सोही खुशीयालीमा योजनाका एक उपभोक्ता ८८ वर्षका टीकाबहादुर सुवेदीले उद्घाटन कार्यक्रमका अतिथि सहित योजना उपभोक्ता समितिका पदाधिकारीलाई खादा ओढाएर उपहार सहित ब्यक्तिगत रुपमा सम्मान गर्नुभयो ।

लामो समयदेखि भोग्दै आएको खानेपानीको असुविधा अन्त्य भएपनि स्थानीय बासिन्दा खुशी भएका हुन् । यसअघि त्यहाँका उपभोक्ता वस्तीभन्दा आधाघण्टा तलको मूलमा पुगेर खानेपानी ओसार्ने गर्दथे । घरमै पानीको सुविधा प्राप्त भएपछि समयको बचत भएको एक उपभोक्ता सीमा बरामले बताउनुभयो । स्थानीय सूर्यज्योती माध्यमिक विद्यालयका विद्यार्थीहरु पनि आफ्ना लागि पानी ओसार्न जानु पर्ने अवस्था थियो । पानी भरेर फर्कँदा पहिलो पिरियडको पढाईनै छुटाउनु पर्ने अवस्था अन्त्य भएकाले विद्यालय परिवार पनि खुशी भएको शिक्षक बाबुराम नेपालीले बताउनुभयो ।

२०७१ सालबाट निर्माण शुरु भएको पञ्चवर्षीय आयोजनाको निर्माणको क्रम जारी छ । हालसम्म २ करोड ११ लाख रुपैयाँ खर्च गरि ७९ घरधुरीमा खानेपानी सुविधा पुर्‍याइएको भुत्तेधारा खानेपानी तथा सरसफाई उपभोक्ता समितिकी कोषाध्यक्ष विष्णुमाया श्रेष्ठले जानकारी दिनुभयो । आयोजनाबाट भञ्ज्याङ गाऊँका ५८ घरधुरी, पाल्खुका ७, बहाकोटका ९ घरधुरी लाभान्वित भएका छन् । सोही योजनाको पानी इलाका प्रहरी कार्यालय ताकुकोट, गाऊँपालिका कार्यालय र सूर्यज्योती माविले पनि उपभोग गरेका छन् । सामाजिक संघसंस्थालाई निशुल्क रुपमा खानेपानी उपभोग गर्न दिइएको छ । उपभोक्तालाई भने १ देखि ६ युनिटसम्मको शुल्क २ शय ५० रुपैयाँ निर्धारण गरिएको छ । यस्तै ७ देखि १० युनिटसम्म थप ५० रुपैयाँ, ११ देखि १५ युनिटसम्म ७५ रुपैयाँ र १६ देखि २० युनिटसम्मको ९० रुपैयाँ थप शुल्क लाग्ने उपभोक्ता समितिका सचिव नेत्रप्रसाद निरौलाले बताउनुभयो ।।