‘स्ट्रबेरी’ खेतीमा रमाइरहेका पूर्वी नवलपरासीका किसानहरु
नवलपुर- पूर्वी नवलपरासीको कावासोती नगरपालिका–७ कि मिश्रा पराजुलीले तीन वर्षदेखि स्ट्रबेरी खेतीबाट राम्रो आम्दानी लिइरहनुभएको छ ।
जिल्लामै पहिलो पटक व्यवसायिक स्ट्रबेरी खेती सुरु गर्नुभएकी पराजुलीले वार्षिक पाँच लाखभन्दा बढी आम्दानी गर्दै आउनुभएको छ ।
पहिलो वर्ष दुई लाख लगानीमा सुरु भएको स्ट्रबेरी खेतीले राम्रो आम्दानी दिन थालेको उहाँ बताउनुहुन्छ ।
“यो सिजनमा छ क्विन्टलभन्दा बढी स्ट्रबेरी स्थानीय बजारमा बिक्री गरिसकेको छु” पराजुलीले भन्नुभयो, “प्रतिकिलो छ सयका दरले बारीबाट बिक्री भएको छ, अझै बिक्रीका लागि तयार हुँदैछन् ।”
तराईमा स्ट्रबेरी खेती हुन्छ र यसबाट आम्दानी गर्न सकिन्छ भन्ने धेरैलाई थाहा छैन ।
किसान सुदिप दवाडीले पनि तराई भूभागमै स्ट्रबेरीखेती गरेर आम्दानी लिइरहनुभएको छ । उहाँले रोपेको बिरुवामा अहिले स्ट्रबेरी लटरम्म फलेका छन् ।
“प्लास्टिक टनेलमा मल्चिङ प्रविधिको प्रयोग गरी सिँचाइ सुविधा पुर्याउन थोपा सिँचाइको व्यवस्था गरिएको छ”, उहाँले भन्नुभयो, “स्थानीय बजारसँगै बाह्य क्षेत्रबाट समेत माग आउन थालेको छ, बारीमै आई टिपेर लैजाने ग्राहक पनि धेरै नै आउने गरेका छन् ।” दवाडीले दुई कठ्ठा क्षेत्रफलमा स्ट्रबेरी लगाउनुभएको छ ।
हालसम्म तीन लाख बढी आम्दानी गरिसकेको र अझै स्ट्रबेरी बिक्री गर्न बाँकी रहेकाले आम्दानी बढ्ने दवाडीको अनुमान छ ।
“इन्टरनेटका माध्यमबाट खेती गर्ने तरिका सिक्यौँ, कृषि विज्ञको सल्लाह लिएर प्लास्टिक टनेलमा चितवनबाट पहिलो वर्ष आठ सय स्ट्रबेरीका बोट ल्याई रोपेका हौँ”, उहाँले भन्नुभयो, “यसरी फस्टाउने कल्पना नै गरेका थिएनौँ अहिले दुई हजारभन्दा बढी स्ट्रबेरीका बिरुवा लगाएका छौँ ।”
एउटै बोटमा एक किलोसम्म स्ट्रबेरी फल्ने गरेको छ । आफ्नो घरपरिवारसँगै एक जनालाई रोजगार दिएको दवाडी बताउनुहुन्छ । स्ट्रबेरीका नयाँ बिरुवा तयार गरी नर्सरीसमेत बनाइएको छ ।
उत्पादन भएको सबै फल बिक्री नभएमा प्रशोधन गरी जाम, रस, आइसक्रिम, मिल्क सेक बनाइ बजारमा बेच्न मिल्ने भएकाले जोखिम कम रहेको उहाँले बताउनुभयो । उहाँले भाडामै दुई बिघा जग्गा लिएर स्ट्रबेरी, खरबुजा, ड्रागन फल, कागती, बयर, सितलचिनी खेती गर्नुभएको छ ।
स्टबेरी स्वास्थ्यका लागि सबै भन्दा राम्रो भएकाले र हेर्दा बच्चाहरूलाई आकर्षण गराउने भएकाेले पनि किन्नेहरु बारीमा नै आएर आफैँले टिपेर लैजान पाउँदा निकै खुशी लाग्ने गरेको स्थानीय मन्जु लम्सालको अनुभव छ ।
ठाउँ र जातअनुसार स्ट्रबेरीका बिरुवा हुर्कन सक्ने कृषि ज्ञानकेन्द्र नवलपुरका प्रमुख कुलप्रसाद तिवारी बताउनुहुन्छ।
“फूल फूलेको करिब ३० देखि ४५ दिनभित्र फलको विकास हुन्छ र त्यसको १५ देखि २० दिनपछि फल टिप्न लायक हुन्छ”, उहाँले भन्नुभयो, “हिउँदमा फस्टाउने स्ट्रबेरीको वृद्धि विकासका लागि दिनमा २२ देखि २५ डिग्री सेल्सियस र रातमा ७ देखि १३ डिग्री सेल्सियस तापक्रम सबैभन्दा राम्रो मानिन्छ ।”
प्रतिक्रिया राख्नुहोस्