लम्पीस्किन बिरुद्ध खोप अभियान शुरु

रामेछाप- रामेछाप जिल्लामा आजबाट पशुमा लाग्ने घातक रोग लम्पीस्किन बिरुद्धको खोप अभियान शुरु भएको छ ।

अभियान अन्तर्गत जिल्लाभरिका ६ हजार गाई, गोरु र भैंसीलाई खोप दिइने पशु सेवा केन्द्र रामेछापले जनाएको छ ।

गत बर्ष लम्पीस्किन रोग रामेछाप जिल्लामा महामारीको रुपमा फैलिको थियो । यस बर्ष भने रोग लाग्नु अगाडि नै रोग लाग्न नदिनका लागि खोप अभियान शुरु गरिएको हो ।

खोप अभियानको शुरुवात मन्थली नगरपालिकाको महालक्ष्मि कृषि तथा पशुपालन फर्मबाट गरिएको छ । जिल्लाको ८ वटै स्थानीय तहमा खोप कार्यक्रमलाई अभियानका रुपमा संचालन गरिने पशु सेवा कार्यालय रामेछापका प्रमुख प्रकाश थापाले बताउनु भयो ।

जिल्लामा करिव १ लाख बढी पशु रहेको कार्यालयले जनाएको छ । तर अहिले भ्याक्सीनको सिमितताले गर्दा ६ हजार पशुलाई मात्र खोप दिन लागिएको छ । लम्पीस्किन रोगका कारण गत बर्ष धेरै पशु मर्नुका साथै हजारौं पशु बिरामी परेकाले अहिले मन्थली नगरपालिकामा खोप अभियान शुरु गरिएको मन्थली नगरपालिकाका पशु प्राविधिक रोहणी चापागाईंले बताउनु भयो ।

रामेछाप जिल्लामा अघिल्लो बर्ष २९ हजार पशु लम्पिस्किन कारण बिरामी परेका थिए ।

आजबाट शुरु गरिएको सप्ताहव्यापी अभियान साउन ३२ गते सम्म चल्ने पशु सेवा कार्यालय रामेछापले जनाएको छ ।

जिल्लाका सवै स्थानीय तहहरुले पशु प्राविधिकमार्फत अहिले खोप अभियान संचालन गरेका छन् ।।