काठमाडौँ – ‘नेपाल कल्चरल इन्टरनेशनल फिल्म फेस्टिभल’ (एनसिआईएफएफ)को छैटौँ संस्करण सम्पन्न भएको छ । काठमाडौँको राइजिङ मलको क्युएस सिनेमामा मोहन अभिलाषीको लघु चलचित्र पाउलोको प्रदर्शनसँगै सुरु भएको ३ दिने चलचित्र महोत्सव चलचित्र विकास बोर्डमा उत्कृष्ट राष्ट्रिय तथा अन्तर्राष्ट्रिय चलचित्रहरूलाई अवार्ड वितरणसँगै समापन गरिएको थियो । राष्ट्रिय चलचित्रतर्फ लक्ष्मण सुनारको बुलाकी र अन्तर्राष्ट्रियतर्फ भारतको चलचित्र पुभुले सर्वोत्कृष्ट चलचित्र अवार्ड प्राप्त गरेको छ । राष्ट्रियतर्फ प्रतिस्पर्धामा सहभागी चलचित्रहरू बुलाकी, पुजार सार्की, डेसान, पखेटा र बिच्छेद मध्ये ‘पुजार सार्की’ फिल्मबाट अभिनेता आर्यन सिग्देल र अभिनेत्री अञ्जना बराइली उत्कृष्ट अभिनेता–अभिनेत्री घोषित भएका थिए । उत्कृष्ट निर्देशकको अवार्ड चलचित्र पुजार सार्कीबाट दिनेश राउत, उत्कृष्ट छायाकारको अवार्ड चलचित्र बुलाकीबाट शिव ढकाल, इन्करेजमेन्ट अवार्ड बुलाकीबाट अभिनेता नरेन खड्काले र उत्कृष्ट स्क्रिप्टको अवार्ड चलचित्र पखेटाबाट सनोल दासले हासिल गरेका छन् ।
यस्तै राष्ट्रिय प्रतिस्पर्धामा उत्कृष्ट लघु चलचित्रको अवार्ड रित्तो गाउँबाट रामजी ज्ञवाली, वृत्तचित्रको अवार्ड नो मोनास्ट्री नो भिलेजबाट टासी ल्हाजोमले, महिला चलचित्रको अवार्ड पिरियडबाट रेवती गुरुङले, बाल चलचित्रको अवार्ड द स्कुल वालबाट मोहन श्रेष्ठले कल्चरल चलचित्रको अवार्ड चिपागु निलाबाट योवन शाक्यले, जुरी मेन सन अवार्ड चलचित्र छेसाङबाट रजिला श्रेष्ठले, स्पेसल मेन सन अवार्ड सर्ट फिल्म थ्रेसोल्डबाट सरिता शाहले र एभोन्टोज पपुलर अवार्ड चलचित्र लेट नाईटबाट ओविन उद्दिनले प्राप्त गरेका छन् ।
राष्ट्रिय प्रतिस्पर्धाको निर्णायकमा वरिष्ठ सङ्गीतकार तथा चलचित्र विकास बोर्डका पूर्व अध्यक्ष शम्भु जीत बास्कोटा, अभिनेत्री मिथिला शर्मा, अभिनेता प्रदीप खड्का, अभिनेत्री सुरक्षा पन्त, चलचित्र निर्देशक दीपेन्द्र के. खनाल, चलचित्र निर्माता एवम् निर्देशक रौनक विक्रम कँडेल, निर्देशक दिनेश लिङदेन र टेलिभिजनकर्मी टिकाराम यात्री थिए ।
सूचना सञ्चार तथा प्रविधि मन्त्री पृथ्वी सुब्बा गुरुङ, चलचित्र विकास बोर्डका अध्यक्ष दिनेश डिसी, अग्रज सङ्गीतकार एवं महोत्सवका राष्ट्रियतर्फ निर्णायक प्रमुख शम्भु जीत बास्कोटा, नेपाली र विदेशी निर्णायकहरू, अग्रज अभिनेत्रीहरू वसुन्धरा भुसाल, भुवन चन्द, चैते देवी सिंहले लगायतले विजेताहरूलाई अवार्ड प्रदान गरेका थिए । चलचित्र केन्द्रको आयोजना र चलचित्र विकास बोर्डको सह आयोजनामा आयोजित महोत्सवमा ४७ देशका ९८ वटा चलचित्रहरू अन्तिम प्रतिस्पर्धामा थिए । यी सबै चलचित्रलाई महोत्सवमा प्रदर्शन गरिएको थियो ।
अन्तर्राष्ट्रिय प्रतिस्पर्धामा चलचित्र पुभुबाट उत्कृष्ट अन्तर्राष्ट्रिय अभिनेताको अवार्ड मन्जुलन केभीले हासिल गरे भने उत्कृष्ट अभिनेत्रीको अवार्ड जर्मनीबाट चलचित्र इम्पियोरबाट अभिनेत्री युनिस कचीरुवाले हासिल गरिन् । उत्कृष्ट फिचर चलचित्र निर्देशकको अवार्ड अमेरिकाको चलचित्र ला फोर्सबाट जी ओभानी एम जेल्कोले हासिल गरे । अन्तर्राष्ट्रिय लघु चलचित्रको अवार्ड बङ्गलादेशको सर्ट फिल्म सौदा, उत्कृष्ट महिला चलचित्रको अवार्ड रसियाको चलचित्र द रि युनियनबाट लोलिता नारान ओभिचले, बाल चलचित्रको अवार्ड भियतनामको चलचित्र लस्ट फर फ्रिडमबाट जाकुभ जाजाकले हासिल गरे ।
अन्तर्राष्ट्रिय वृत्तचित्रको अवार्ड क्यानडाको चलचित्र नुरागा भूमिबाट डानियल खान डा लिल्भाले, इन्भारोमेन्टल चलचित्रको अवार्ड स्पेनको चलचित्र द सोल अफ ज्यास्मिनबाट मरिना गार्सिया एन्ड्युले, अन्तर्राष्ट्रिय मानव अधिकार चलचित्रको अवार्ड अमेरिकाको अमेरिकन फुल ब्रोडबाट क्रिस्टिना होडेलले हासिल गरे । यस्तै एनिमेसन चलचित्रको अवार्ड साउथ अफ्रिकाको चलचित्र फ्लावर अफ दि पार्टिसनबाट चार्लेस बाडेनहोस्टले, अन्तर्राष्ट्रिय छायाकारको अवार्ड स्पेनको चलचित्र स्पिक सन लाइटबाट जसी लुईस अल्कानीले, उत्कृष्ट चलचित्र स्क्रिप्टको अवार्ड इटालीको चलचित्र आउट डियरबाट ऐस्यान्डो लियोनीले, जुरी मेन्सन अवार्ड अर्जेन्टिनाको चलचित्र द टेम्पल अफ इन्टरनल साउन्डबाट जर्ज क्याराभोटाले, स्पेशन मेन्सन अवार्ड बेलायतको चलचित्र लकडाउन गर्डेन डायरीबाट एड्रिना उलिकले प्राप्त गरे । यस्तै पपुलर अवार्ड जर्मनीको चलचित्र सिड वीथ मीबाट अकिफा मियानले, इन्करेजमेन्ट अवार्ड नेपालको चलचित्र जाईन पपेट्स फर डिज्निफाईड मेन्सुरेसनबाट ओडिटी लारामीले हासिल गरे ।
महोत्सवमा अन्तर्राष्ट्रियतर्फ आठ जना विदेशी निर्णायकहरू मध्ये भारतबाट निपोन धौला, जर्मनीबाट फाविन मात्थियस, इरानबाट तिमा टाघिजादेह, बहराइनबाट इभा दाउद र रुसबाट इरिना बेराजी महोत्सवमा उपस्थित रहेका थिए । अन्तर्राष्ट्रिय निर्णायकमा भारतबाट चलचित्र निर्देशक निपोन धौला, जर्मनी चलचित्रकर्मी फाविन मात्थियस र चलचित्रकर्मी इभिन बिराजी, बेलायतबाट चलचित्र लेखक तथा निर्देशक लुईसा प्रिटोलानी, क्यानडाबाट चलचित्र निर्देशक जुडी ग्लाड्स्टोन, इरानबाट अभिनेत्री, लेखक तथा निर्देशक तिमा टाघिजादेह, बहराइनबाट चलचित्र निर्माता निर्देशक एवम् लेखक इभा दाउद र रुसबाट चलचित्रकर्मी इरिना बेराजी रहेका थिए ।
कार्यक्रममा सञ्चार मन्त्री गुरुङले चलचित्रको विकास र विस्तारमा यस्तो महोत्सव निकै उपयोगी हुने बताउनुभयो । उहाँले सबै विदेशी अतिथिहरुलाई भगवानको रूपमा आफूहरूले लिने गरेको भन्दै आउँदो वर्षहरूमा पनि महोत्सवमा सहभागी हुन विदेशीहरूलाई अनुरोध गर्नुभयो ।
बोर्डका अध्यक्ष डिसीले चलचित्र विकास बोर्डको सहकार्यमा निकै राम्रो महोत्सव सम्पन्न भएको बताउनुभयो । उहाँले नेपालमा हुने गरेका अन्तर्राष्ट्रिय महोत्सवले नेपाललाई विश्वमा चलचित्रमार्फत चिनाएको बताउनुभयो।
महोत्सवका अध्यक्ष एवम् निर्देशक सन्तोष सुवेदीले नेपालमा महोत्सव आयोजना गर्न निकै गाह्रो हुने गरेको बताउनुभयो । मौलिक कला, संस्कृतिको संरक्षण, संवद्र्धन र चलचित्र विकास गर्नु हामी सबैको दायित्व हो । यूनेस्कोको कार्यक्रमअन्तर्गत काठमाडौँ महानगरपालिका फिल्म सिटीमा घोषणा भएको तर महानगरमै यति ठुलो महोत्सव हुँदासमेत महानगरले बेवास्ता गरेको उहाँको गुनासो छ । नेपालको राजधानी काठमाडौंमा ४७ देशका चलचित्रहरू समावेश गरेर महोत्सव गर्न पाउँदा आफूलाई मात्र नभएर देशकै लागि गर्वको कुरा रहेको उहाँले बताउनुभयो । यो महोत्सवमा चलचित्रका अन्य विधालाई पनि प्रोत्साहन गरेको कारण यो चलचित्र महोत्सव अझ बढी महत्वपुर्ण रहेको उहाले बताउनुभयो । नेपालमा विधाअनुसारको विषयवस्तुमा कम फिल्म बन्छ, कि त बन्दै बन्दैन । बने पनि त्यसलाई प्रदर्शन गर्ने स्थान र प्रोत्साहन गर्ने संस्था छैन । विषयगत चलचित्रहरू उत्कृष्ट बन्दा पनि तिनीहरूले स्थान पाउँदैनन्, पाईहालेपनि प्रतिस्पर्धामा पछाडि नै राखिन्छ । तर यो महोत्सवले सबैलाई समेट्न सकेको उहाँको दाबी छ ।
महोत्सवमा कला प्रदर्शनीसँगै विभिन्न सांस्कृतिक प्रस्तुतीहरुपनि समावेश गरिएका थिए । समापनमा प्रस्तुत गरिएको अक्षरिका स्कुलबाट राउटे नृत्य तथा प्रीतिमा स्कुलबाट छाउपडी साङ्गीतिक नाटकले कार्यक्रमलाई अझ बढी रोमाञ्चक बनाएको थियो । महोत्सवमा विभिन्न देशका ४ दर्जन बढी विदेशी अतिथिहरूलाई नेपाली ढाका टोपी र ढाकाको खादा लगाएर स्वागत तथा बिदाइ गरिएको थियो ।
प्रतिक्रिया राख्नुहोस्