मुटुरोग विशेषज्ञ डा अवनिभूषणको ‘मान्छेको मुटु’ पुस्तक सार्वजनिक

काठमाडौँ– वरिष्ठ मुटुरोग विशेषज्ञ डा अवनिभूषण उपाध्यायको पुस्तक ‘मान्छेको मुटु’ सार्वजनिक गरिएको छ ।

राजधानीमा आयोजित एक कार्यक्रमका बीच पुस्तकका प्रकाशक इदा उपाध्याय, वरिष्ठ फिजिसियन डा सत्यनारायण सुवाल, वरिष्ठ मुटुरोग विशेषज्ञ डा रत्नमणि गजुरेल,वरिष्ठ मुटुरोग विशेषज्ञ डा प्रकाशराज रेग्मी, साहित्यकार राजेन्द्र थापा, लेखक तथा सम्पादक लक्ष्मण अधिकारीले संयुक्त रूपमा पुस्तक लोकार्पण गर्नुभयो ।

डा रेग्मीले मुटुसँग सम्बन्धित वैज्ञानिक, प्राविधिक, आध्यात्मिक, भावनात्मक सबै पाटो जोडिएर पुस्तक लेखिएको बताउनुभयो । उहाँले भन्नुभयो, “जीवनको सुरुआत नै मुटुको धड्कनबाट हुन्छ र अन्त्य पनि यसैबाट । पुस्तकमा मुटुबारे विविध जानकारी हुनाका साथै मन र आत्माबारे चर्चा छ । प्रश्नोत्तर शैलीमा लेखिएको पुस्तक रोचक छ ।”

साहित्यकार थापाले पुस्तकले आमपाठकले बुझ्ने गरी मुटुसम्बन्धी सरल भाषामा जानकारी प्रस्तुत गरिएको बताउनुभयो । उहाँले पुस्तकले मेडिकलभन्दा पनि आममानिसका मुटुसम्बन्धी जिज्ञासालाई प्रश्नोत्तरमार्फत मनका कुरा रोचक ढङ्गले लेखिएको र यो सबैका लागि उपयोगी भएको बताउनुभयो ।

सार्वजनिक पुस्तक सार्वसाधरण सबैलाई काम लाग्ने गरी लेखिएको यसमा विशेषगरी मुटु रोग कसरी लाग्छ? मुटु रोगबाट लाग्न नदिन के खाना खाने ? के खाना नखाने जस्ता विषयहरु समेटिएको र साधारण भाषामा लेखिएको लेखक उपाध्यायले नेपाल टिभीअनलाइनलाई बताउनु भयो । गैरआख्यान विधाको यो पुस्तक ३१० पृष्ठको छ । यो उहाँको दोस्रो पुस्तक हो ।

साढे चार दशकदेखि मुटु उपचार संलग्न डा उपाध्यायको यसअघि ‘मुटुसँग सहयात्रा’ नामक पुस्तक प्रकाशन भइसकेको छ ।