जलविद्यु आयोजनाका सुरुङहरुमा खोज तथा उद्धार कार्य जारी

काठमाडौँ- सरकारले भोटेकोशी बाढीबाट क्षतिग्रस्त विभिन्न जलविद्यु आयोजनाका सुरुङहरुमा खोज तथा उद्धार कार्य जारी राखेको छ । बाढीको ११ दिनसम्म पनि केहीलाई जीवितै उद्धार गरिएपछि अझै पनि जीवितै उद्धार गर्न सकिन्छ कि भन्ने आशा कायमै छ ।

यसै क्रममा रसुवागढी जलविद्युत आयोजनाको सुरुङमा संयुक्त उद्धार टोलीले आयोजनाको छैटौ तलामा पुगेर खोज गरेको जनाएको छ । त्यस क्रममा कोही पनि नपेरेको खोज तथा उद्धार टोलीको भनाइ छ । यस आयोजनाका पाँच तल्ला पुरै लेदोले भरिएकाले थप उद्धार कार्य जारी रहेको जनाइएको छ । यसै गरी त्रिशूली 3A मा जलविद्युत् आयोजनाको सुरुङभित्र फसेकाहरूको नेपाली सेनाका ७५, सशस्त्र प्रहरी बल, नेपालका १८ एवम् नेपाल प्रहरी र विज्ञ सहितको संयुक्त उद्धार टोलीले थप खोज तथा उद्धार कार्य जारी राखेको छ ।

यस्तै त्रिशूली 3B मा पनि नेपालीसेना का ८९, गैर सैनिक ३ र आयोजनाका प्रबन्ध निर्देशक सहितको संयुक्त उद्धार टोलीद्वारा ३ वटा Bobcat र जेनेरेटरको प्रयोग गरी खोजी कार्य जारी राखेको जनाएको छ । यो आयोजनाको अडिट 2 सुरुङबाट Excavator जान सक्ने गरी बाटो सफा गरेको छ । चिलिमेहाइड्रो मा विदेशीसहितको संयुक्त टोलीले Mini Excavator र Mud Pump को सहायताले लेदो फाल्ने कार्य गरी पुनः १०५ मिटर भित्रसम्म पुगेर खोज तथा उद्धार कार्य गरिरहेको छ । माथिल्लो त्रिशुली १ को हाकु स्थित सुरुङको २५० मिटर भित्रबाट विदेशी सहितको संयुक्त उद्धार टोलीले एक जना चिनियाँ नागरिक को जीवित उद्धार गरेको र थप २ वटा शव फेला पारी उद्धार गरेको छ ।

साथै, सुरुङमा रहेको लेदो हटाउँदै खोज तथा उद्धार कार्यलाई निरन्तरता दिएको जनाएको छ । सुरुङ मात्र नभई जमिनमै पनि खोज, उद्धार र राहत कार्यलाई तीब्रता दिइएको छ । प्रभावित क्षेत्रका मैलुङदेखि स्याफ्रूबेसीसम्म पैदल गस्ती गरी खोज तथा उद्धार कार्य भइरहेको जनाइएको छ ।

साथै,नेपालीसेनाले त्रिशूली र धुन्चेमा स्थापना गरेको आपत्कालीन उपचार केन्द्र तथा मेडिकल गस्तीबाट हालसम्म जम्मा ३ हजार २९७ जनाले स्वास्थ्य सेवा प्राप्त गरेका छन्। रसुवाको टिमुरेदेखि नुवाकोट, धादिङ, चितवन र नवलपरासी पूर्वका प्रभावित क्षेत्रहरूमा नेपालीसेनाका ९ हजार ३ सय भन्दा बढी फौज प्रत्यक्ष रूपमा खटिई समन्वयात्मक रूपमा घाइतेहरूको खोज तथा उद्धार, शव व्यवस्थापनमा सहयोग, राहत सामग्री ढुवानी, अवरुद्ध सडक तथा पुल सुचारु एवम् आपत्कालीन उपचार कार्य गरिरहेका छन् ।।