लन्डनस्थित नेपाली दूतावासमा गौतम बुद्धको प्रतिमा अनावरण
काठमाडौँ- बेलायतको लन्डनस्थित नेपाली दूतावासमा भगवान् गौतम बुद्धको प्रतिमाको औपचारिक अनावरण गरिएको छ ।
संस्कृति, पर्यटन तथा नागरिक उड्डयनमन्त्री खडक राज पौडेलले बुद्ध प्रतिमाको अनावरण गर्नुभएको हो ।
नेपाली दूतावासद्वारा आयोजित विशेष ‘नेपाल इभिनिङ’ कार्यक्रममा बुद्ध प्रतिमाको अनावरण गरिएको हो ।
लन्डनस्थित नेपाली दूतावासमा बुद्ध प्रतिमाको स्थापना हुनु नेपालको बौद्ध सम्पदा र भगवान् गौतम बुद्धको जन्मभूमिका रूपमा नेपालको अन्तर्राष्ट्रिय पहिचानलाई थप सुदृढ बनाउने महत्वपूर्ण कदमका रूपमा लिइएको छ ।
कार्यक्रममा मन्त्री पौडेलले भगवान् गौतम बुद्धलाई शान्ति र करुणाका विश्वदूतका रूपमा चित्रण गर्दै बेलायतस्थित नेपाली दूतावासमा बुद्ध प्रतिमा स्थापनाबाट विश्वव्यापी शान्ति र करुणाको सन्देश अन्तर्राष्ट्रिय समुदायसम्म पुर्याउन उपयुक्त हुने बताउनुभयो ।
कार्यक्रममा बेलायतका लागि नेपालका कार्यवाहक राजदूत बिपिन दुवाडीले एनआरएनएको पहलको प्रशंसा गर्दै नेपालको बौद्ध सम्पदा र सांस्कृतिक पहिचानलाई अन्तर्राष्ट्रिय स्तरमा प्रवर्द्धन गर्न संघले पुर्याउँदै आएको योगदानको सराहना गर्नुभयो ।
अभियानको मुख्य उद्देश्य भगवान् गौतम बुद्धको जन्मस्थल लुम्बिनीलाई अन्तर्राष्ट्रिय बौद्ध तीर्थस्थल, आध्यात्मिक पर्यटन तथा सांस्कृतिक आदानप्रदानको महत्वपूर्ण गन्तव्यका रूपमा प्रवर्द्धन गर्नु हो ।
दूतावासमा बुद्ध प्रतिमा गैरआवासीय नेपाली संघ (एनआरएनए) अन्तर्राष्ट्रिय समन्वय परिषद् (ICC) को पहलमा गैरआवासीय नेपाली संघ राष्ट्रिय समन्वय परिषद् यूके (NCC UK) तथा बुद्ध फाउन्डेसन यूकेको सहकार्य र समन्वयमा स्थापना गरिएको हो ।
यस अभियानमा नेपाल पर्यटन बोर्ड (NTB) ले बुद्ध प्रतिमालाई नेपालबाट बेलायतसम्म ढुवानी गर्न आवश्यक सहयोग उपलब्ध गराएको थियो ।
विभिन्न संस्थाको सहकार्य र योगदानबाट नेपालको बौद्ध सम्पदालाई अन्तर्राष्ट्रिय स्तरमा प्रवर्द्धन गर्ने अभियान अघि बढेको एनआरएनए अन्तर्राष्ट्रिय समन्वय परिषद्का प्रवक्ता तथा पर्यटन प्रवर्द्धन समितिका अध्यक्ष सोमनाथ सापकोटाले जानकारी दिनुभयो ।।
प्रतिक्रिया राख्नुहोस्