म्याग्दीका नौजना उत्कृष्ट किसान र एक कृषि समूहलाई सम्मान

 म्याग्दी – १२औं राष्ट्रिय कृषक दिवसको अवसरमा  हिमाली जिल्ला म्याग्दीका नौजना उत्कृष्ट किसानहरु सम्मानित भएका छन् ।

कृषि र पशुपालनको क्षेत्रमा पु¥याएको योगदानको उच्च कदर गर्दै आइतबार उत्कृष्ट नौजना किसान र कृषि समूह छनोट गरी सम्मान गरिएको हो ।
कृषि ज्ञान केन्द्र म्याग्दी र अन्नपूर्ण गाउँपालिकाले छुट्टाछुट्टै कार्यक्रमको आयोजना गरी उत्कृष्ट किसान र कृषि समूहलाई सम्मान गरेको जनाएका छन् । सम्मानित हुनेहरुमा बेनी नगरपालिका–१, रत्नेचौरका दल गिरी पुन, मंगला गाउँपालिका–१, पूर्णगाउँका ठहरबहादुर केसी, बेनी नगरपालिका–४, डाँडाखेतका महेन्द्र बानियाँ र बेनी–६, बाँसबोटका दुर्गाप्रसाद पौडेल रहनुभएको छ ।
उहाँहरु सबैलाई जनही १०÷१० हजार रुपैयाँसहित सम्मानपत्रले सम्मान गरिएको हो । उत्कृष्ट किसानहरुलाई कृषि ज्ञान केन्द्र म्याग्दीका प्रमुख सञ्जीव बास्तोला, भेटेरिनरी अस्पताल तथा पशु सेवा विज्ञ केन्द्रका प्रमुख डा. भरत रेग्मी र प्रधानमन्त्री कृषि आधुनिकीकरण परियोजना कार्यान्वयन एकाई म्याग्दीका कृषि अधिकृत बिक्रम बस्यालले पुरस्कार प्रदान गर्नुभएको थियो । चालु आर्थिक वर्षमा कृषि ज्ञान केन्द्र म्याग्दीमार्फत सञ्चालित जिल्लास्तरीय उत्कृष्ट कृषि पुरस्कार कार्यक्रममा सहभागीमध्ये उत्कृष्ट कृषक छनौट गरी सम्मान गरिएको थियो ।
यसैगरी म्याग्दीको अन्नपूर्ण गाउँपालिकाले पनि राष्ट्रिय कृषक दिवसको अवसरमा उत्कृष्ट पाँचजना कृषक र एकवटा कृषि समूह छनोट गरी सम्मान गरेको जनाएको छ । सम्मानित हुनेहरुमा घारका तेजबहादुर बरुवाल, राम्चेका चित्रबहादुर गर्बुजा, हिस्तानकी टिका पाईजा तिलिजा तथा बेगबहादुर पूर्जा र राम्चेका तुलबहादुर पाईजा रहनुभएको छ ।

उहाँहरु सबैलाई जनही ३५ हजार आठसय रुपैयाँको दरले नगदसहित कदरपत्रले सम्मान गरिएको गाउँपालिकाको कृषि विकास शाखा प्रमुख कृति आचार्यले जानकारी दिनुभयो । त्यस्तै नारच्याङको सक्रिय जागरुक महिला कृषि समूहलाई नगद २० हजार रुपैयाँसहित कदरपत्रले सम्मान गरिएको छ ।
राष्ट्रिय कृषक दिवसको अवसरमा उत्कृष्ट कृषकको रुपमा आफूहरु सम्मानित हुन पाएकोमा किसानहरु खुसीले दङ्ग परेका छन् । वि.सं. २०७० सालदेखि मनाउन सुरु भएको कृषक दिवसको अवसरमा विभिन्न ठाउँका उत्कृष्ट किसानलाई सम्मान गर्ने गरिन्छ । देशभरका किसानको सम्मान, समस्या र कृषि क्षेत्रको अवस्था सुधार्न गर्नुपर्ने पहलमा जोड दिएर हरेक वर्ष जेठ २७ गतेको दिन राष्ट्रिय कृषक दिवस मनाउन थालिएको हो ।।