शाहरुख खान आँखाको उपचारका लागि अमेरिका जाने

एजेन्सी । बलिउडका सुपरस्टार शाहरुख खानले मुम्बईको एक अस्पतालमा आँखाको उपचार गराएको खबर चर्चामा छ । तर, यो उपचार अभिनेताले चाहेजस्तो हुन सकेन ।

यस्तो अवस्थामा अब शाहरुख आँखाको उपचारका लागि अमेरिका जानेछन् । अभिनेताका नजिकका स्रोतका अनुसार शाहरुख मंगलबार उपचारका लागि अमेरिका जानेछन् ।

एक रिपोर्टमा शाहरुख दुवै आँखामा मोतियाबिन्दुको समस्याबाट पीडित रहेको दाबी पनि गरिएको छ । तर, अहिलेसम्म यस विषयमा अभिनेता वा उनको टोलीबाट कुनै पुष्टि भएको छैन ।

यसअघि शाहरुख हालै निर्देशक तथा साथी फराहलाई भेट्न गएका थिए । यस अवसरमा शाहरुखकी पत्नी गौरी खान र छोरी सुहाना पनि थिइन् । फराहको आमाको निधन भएको थियो ।

कामको कुरा गर्दा शाहरुखको अन्तिम फिल्म ‘डंकी’ गत वर्ष डिसेम्बरमा रिलिज भएको थियो । हाल अभिनेता आफ्ना सन्तान सुहाना र आर्यनको डेब्यु प्रोजेक्टमा काम गरिरहेका छन् । शाहरुख र सुहाना फिल्म ‘किंग’मा सँगै देखिनेछन् ।