इजरायललाई गाजा क्षेत्रमा युद्ध विराम गर्न अमेरिकी राष्ट्रपतिको दबाब

अमेरिकी राष्ट्रपति जो वाइडेनले गाजा क्षेत्रमा तत्काल युद्ध विराम गर्न र कब्जामा रहेका हमासका बन्दीलाई रिहा गराउन इजरायललाई दबाव दिनुभएको छ ।

हमास र इजरेलबीचको वार्ता असफल भएपछि वाइडेनले यस्तो दवाव इजरायललाई दिनुभएको हो ।

विदेशमन्त्री एन्टोनी ब्लीङ्केन अमेरिका फर्किएपछि राष्ट्रपति बाइडेनले इजरेली प्रधानमन्त्री नेतान्याहुलाई फोन गरेर युद्ध विरामका  लागि पुन: आग्रह गर्नुभएको हो ।

शान्ति सम्झौताका सम्बन्धमा हमास र इजरेलले आ-आफ्नो अडान नछोडेपछि कतारमा भएको वार्ता निष्कर्षविहीन भएको थियो ।

वार्ता असफल भएपछि इजरेलले गाजा क्षेत्रमा गरेको आक्रमणमा परी ५० जना प्यालेष्टिनीको मृत्यु भएको छ ।

गाजा फेरि इजरेलको सुरक्षाकालागि चुनौति बन्न नसक्नेगरी युद्धलाई जारी राखिने इजरेलले जनाएको छ ।

हमासले भने वार्तामा युद्ध रोकी इजरेली सेना गाजा क्षेत्रबाट बाहिरिनुपर्ने तथा इजरेलको कब्जामा रहेका प्यालेष्टिनी नागरिकलाई इजरेली नागरिकको बदलामा रिहा गर्नुपर्ने शर्त राखेको थियो ।।