काँग्रेस बैठकमा परराष्ट्रमन्त्रीको ब्रिफिङ: ‘भारतले थप सहयोगको प्रतिबद्धता जनाएको छ’

नेपाली काँग्रेसको केन्द्रीय कार्यसमितिको बैठक अहिले केन्द्रीय कार्यालय सानेपामा जारी छ ।

गत साउन २३ देखि २८ गतेसम्म बसेर रोकिएको बैठक आज फेरि बसेको हो।

अधिकांश केन्द्रीय सदस्यले आफ्ना धारणा राखिसकेकाले आज पूर्व तथा वर्तमान पदाधिकारीहरुले धारणा राख्दै हुनुहुन्छ ।

पदाधिकारीहरुले आफ्नो भनाइ राख्नु अघि आज केन्द्रीय सदस्यसमेत रहनुभएकी परराष्ट्रमन्त्री डा आरजु राणा देउवाले आफ्नो भारत भ्रमणमा भएका उपलब्धिबारे बैठकमा जानकारी गराउनुभएको थियो ।

भारत सरकारको तर्फबाट राम्रो रेस्पोन्स गरेको राणाले बताउनुभयो । नेपालसँग राम्रो सम्बन्ध गाँस्न र सहयोग आदान प्रदान गर्न भारतीय प्रधानमन्त्री र अरु नेताहरु उत्सुक रहेको जानकारी बैठमा परराष्ट्रमन्त्री राणाले गराउनुभएको नेपाली काँग्रेसका केन्द्रीय सदस्य चीनकाजी श्रेष्ठले नेपालटिभीअनलाइनलाई बताउनुभयो ।

नेता श्रेष्ठका अनुसार परराष्ट्रमन्त्री राणाले नेपालको हवाइ रुट परमिट, पञ्चेश्वर योजना र बाढी पिडीतलाई सहयोग गर्ने विषयमा भारतीय परराष्ट्रमन्त्रीसँग कुराकानी गर्नुभएको थियो ।

यसअघि, महामन्त्री गगन थापाले छलफलका लागि प्रस्तुत गरेका ११ एजेण्डाका अतिरिक्त परिमार्जनसहित पेश भएका महासमिति बैठकका प्रतिवेदन माथि पनि बैठकमा छलफल हुँदै आएको छ ।

उपसभापति पूर्णबहादुर खड्काले पेश गरेको नीति प्रतिवेदन, महामन्त्री गगन थापाले राखेको सांगठनिक र अर्का महामन्त्री विश्व प्रकाश शर्माले राखेको समसामयिक प्रतिवेदन माथि छलफल केन्द्रित हुने नेताहरुले बताएका छन ।।