ट्रम्प गाजा सम्झौता कायम रहने विषयमा ‘विश्वस्त हुनुहुन्न’

एजेन्सी – अमेरिकी राष्ट्रपति डोनाल्ड ट्रम्पले सोमबार आफ्नो शपथग्रहणअघि युद्धविरामका लागि गरिएको कूटनीतिको प्रशंसा गर्दै गाजामा युद्धविराम सम्झौता हुने कुरामा आफू विश्वस्त नभएको बताउनुभएको छ ।

“म विश्वस्त छैन”, ह्वाइट हाउस फर्किँदा एक पत्रकारले दुवै पक्षले युद्धविराम कायम राख्ने र सम्झौतामा अघि बढ्ने बारे सोध्दा उहाँले भन्नुभयो, “यो हाम्रो युद्ध होइनस यो उनीहरूको युद्ध हो । तर म विश्वस्त छैन ।”

तथापि ट्रम्पले सन् २०२३ अक्टोबर ७ मा इजरायलमा भएको अभूतपूर्व आक्रमणबाट सुरु भएको युद्धमा हमास ‘कमजोर’ भएको विश्वास गरेको बताउनुभयो । “मैले गाजाको एउटा तस्विर हेरेँ”, उहाँले भन्नुभयो, “गाजा एक विशाल विध्वंस स्थल जस्तै छ ।”

सम्पत्ति व्यवसायीबाट लोकप्रिय राजनीतिज्ञ बन्नुभएका ट्रम्पले योजना अघि बढेमा गाजाले एक ‘अद्भुत’ पुनर्निर्माण देख्नसक्ने बताउनुभयो ।

“यो समुद्र किनारमा रहेको एक अद्भुत स्थान हो – उत्कृष्ट मौसम । तपाईंलाई थाहा छ, सबै कुरा राम्रो छ । यो जस्तो, केही सुन्दर कुराहरू त्यहाँ गर्न सकिन्छ”, उहाँले भन्नुभयो ।

इजरायल र हमासले आइतबार बन्दी र कैदीहरूको आदान–प्रदान समावेश भएको युद्धविराम सम्झौता कार्यान्वयन गर्न थालेका छन् ।

यो योजना सुरुमा तत्कालीन राष्ट्रपति जो बाइडेनले मे महिनामा प्रस्तुत गर्नुभएको थियो र बाइडेन तथा ट्रम्पका दूतहरूको असामान्य संयुक्त कूटनीति पछि यसलाई अघि बढाइएको थियो ।

सम्झौताका लागि दबाब दिँदै ट्रम्पले इजरायललाई दृढतापूर्वक समर्थन गर्ने पनि स्पष्ट पार्नुभएको छ ।

आफ्नो पहिलो कार्यहरू मध्ये एकमा उहाँले प्यालेस्टिनीहरू विरुद्धको आक्रमणलाई लिएर बाइडेन प्रशासनले वेस्ट ब्याङ्कमा कट्टरपन्थी इजरायली बसोबास गर्नेहरूमाथि लगाएको प्रतिबन्धहरू खारेज गर्नुभयो ।