सिद्धि स्मृति महिला तथा बाल अस्पतालमा विशिक्ष्ट सेवा संचालन

भक्तपुर –  सिद्धि स्मृति महिला तथा बाल अस्पतालको सुविधा सम्पन्न नयाँ भवन  उद्घाटनसंगै सञ्चालनमा आएको छ ।

शुक्रवार भव्य समारोहकाबीच भवन उद्घाटन गएको हो । जर्मन नागरिक म्यानफ्रेड लिन्डनरले भवनको उद्घाटन गर्नुभएको हो । उहाँसँगै जर्मनीका विशिष्ट व्यक्तिहरूको सहभागिता रहेको थियो ।

करिब १६ लाखको लागतमा विभिन्न सङ्घसंस्थाको सहयोग बनेको नयाँ भवनमा आइसियु र एन आइसियुसहितका सेवा सञ्चालनमा रहेको अस्पताल व्यवस्थापन समितिका संस्थापक अध्यक्ष श्यामसुन्दर धौभडेलले बताउनु भयो ।

महिला र बालबालिकाको स्वास्थ्य सेवामा महत्त्वपूर्ण योगदान पुर्‍याएको भन्दै जर्मन नागरिकले नयाँ भवन निर्माणमा सहयोग गरेको अस्पताल प्रशासनले जनाएको छ ।

सेवाका हिसाबले विशिष्टीकृत अस्पतालका रूपमा विकास गर्ने योजनासहित सञ्चालनमा आएको र अब बिरामीले घण्टौँ कुरेर बस्ने पर्ने अवस्थाको अत्य हुने जनाइएको छ ।

बिरामी अस्पताल आएको एक घण्टा भित्रै उपचार पाएर घर फर्किने वातावरणसहित अस्पताल अघि बढेको अस्पतालका अध्यक्ष श्याम धौभडेलले बताउनु भयो ।

पाँच तल्ले नयाँ भवन निर्माणकलालागि रु १६ करोड बजेट अनुमान गरे पनि रु १० करोडमा सम्पन्न भएको अध्यक्ष धौभडेलको भनाइ छ ।

विशिष्ट सेवासहित नयाँ भवनमा सञ्चालनमा आएपछि  यो क्षेत्रकै उत्कृष्ट अस्पताल हुने छ भने मातृ शिशु मृत्युदर कम, स्वास्थ्य र शिक्षा क्षेत्रमा ठुलो परिवर्तन आउने अपेक्षा गरिएको छ । यसबाट नगरपालिकालाई समेत टेवा पुग्ने विश्वास लिएको भक्तपुर नगरपालिका वडा नं। ७ का अध्यक्ष उकेश कवाँले बताउनु भयो ।

अस्पतालबाट पछिल्लो समय एक हजार ६ सय ९४ बालबालिकाले स्वास्थ्य सेवा लिएको तथ्याङ्क छ । गत असोज ११ र १२ गते हनुमन्ते खोलाको बाढी पसेर क्षति पुर्‍याएको यो अस्पताल केही समय बन्द रहेको थियो । अब भने जस्तोसुकै बाढी आए पनि कुनै असर नपर्ने गरी अस्पताल निर्माण गरिएको छ । जुनसुकै अवस्थामा पनि सहज सेवा दिने गरी अस्पतालले तयारी गरिएको अस्पतालले जनाएको छ ।

सिद्धि स्मृति प्रतिष्ठानले आफ्नो संस्थागत सामाजिक उत्तरदायित्वअन्तर्गत वृद्धाश्रम पनि सञ्चालन गरिरहेको छ भने अस्पतालले बाल स्वास्थ्य, प्रसूति तथा स्त्रीरोग सम्बन्धी सेवा प्रदान गर्दै आएको छ। अस्पतालले एमडीमा छात्रवृत्ति दिँदै आएको छ । संस्थामा कार्यरत २५० जना कर्मचारीले विश्वसनीय सेवा दिएको भन्दै बिरामीलाई उच्चस्तरीय सेवा दिन नयाँ भवन बनाउन परेको अस्पतालले जनाएको छ । विभिन्न स्वदेशी तथा विदेशी दाताहरूको सहयोगमा प्रतिष्ठानले सञ्चालनमा ल्याएको नयाँ अस्पताल भवनबाट अप्रेसन सेवा पनि दिने भएको छ ।

उद्घाटन कार्यक्रममा बाल स्वास्थ्य विभागका विभागीय प्रमुख ध्रुव श्रेष्ठ, प्रसूति तथा महिला स्वास्थ्य विभाग प्रमुख ज्योतिदेव भण्डारी, बाल शल्य चिकित्सक मनोज कृष्ण श्रेष्ठलगायतले उपचार क्षेत्रमा अस्पतालको प्रशंसा गर्नुभयो ।