गैंडाकोटमा युवती चोटपटकसहित मृत भेटियो, हत्याको आशंका

धनु भुसाल, पूर्वी नवलपरासी– पूर्वी नवलपरासीको गैंडाकोट नगरपालिका-२ शान्तिनगरस्थित डेरामा बस्दै आएकी एक युवती मृत अवस्थामा फेला परेकी छन । जिल्ला प्रहरी कार्यालय पूर्वी नवलपरासीका प्रहरी उपरीक्षक युवराज खड्काका अनुसार गुल्मी मुसिकोट गाउँपालिका–९ घर भई गैँडाकोट–२ मा डेरा गरी बस्दै आएकी करिब २४ वर्षीया बबिता सापकोटा सोमबार साँझ आफ्नै कोठाभित्र चोटपटकसहित मृत अवस्थामा फेला परेकी हुन ।

युवतीसँग सम्पर्क हुन नसकेको भन्दै उनका दाजुले घरबेटीलाई जानकारी गराएपछि इलाका प्रहरी कार्यालय गैँडाकोटमा खबर गरिएको थियो । स्थानीय जनप्रतिनिधि, घरबेटी र आफन्तको रोहवरमा बाहिरबाट लगाइएको ताल्चा खोलेर हेर्दा सापकोटा आफ्नै कोठाभित्र खाटमाथि सिरकले छोपिएको अवस्थामा मृत फेला परेको प्रहरी उपरीक्षक खड्काले जानकारी दिनुभयो ।

प्रारम्भिक अनुसन्धानका क्रममा शरीरका टाउको, घाँटी, दाहिने हातको नाडीमा धारिलो हतियारले काटेको चोट र अनुहारमा निलडाम रहेको छ । घटनाको थप अनुसन्धानका लागि प्रदेश स्तरीय अनुसन्धान टोली तथा कुकुर सहितको विशेष टोली समेत परिचालन गरिएको उपरीक्षक खड्काले बताउनुभयो ।