नाइमा नेपाल मोबिलिटी एक्स्पो-२०२६ काठमाडौँमा सुरु

काठमाडौँ- नाइमा नेपाल मोबिलिटी एक्स्पो-२०२६ आजदेखि सुरु भएको छ ।

नेपाल अटोमोबाइल इम्पोर्टर्स एन्ड म्यानुफ्याक्चर्स एशोसिएशन (नाइमा) को यो दोस्रो एक्स्पो हो ।

एक्स्पो साउन ३१ सम्म संचालन हुने आयोजक संस्थाले जनाएको छ ।

एक्स्पोमा ५१ वटा स्टलमा ५५ गाडीका ब्रान्ड राखिएका छन् । जसमा ४० वटा नयाँ ब्रान्ड, नयाँ मोडल रहेका छन् ।

चारपाँग्रे, दुईपाँग्रे तथा विभिन्न ब्रान्डका नयाँ विद्युतीय कार, दुईपाँग्रे ई–स्कुटर तथा विद्युतीय व्यावसायिक सवारीसाधन प्रदर्शनमा राखिएका छन्।

एक्स्पोमा नयाँ सवारीसाधनका साथै बैंक तथा वित्तीय संस्था र बीमा कम्पनीको पनि सहभागिता रहेको छ । सवारीसाधन खरिदका लागि विशेष अफर र सहुलियत कर्जा योजनासहित बैंक तथा वित्तीय सँस्थाहरु सहभागी छन् ।

यसैगरी अटो पार्टपुर्जा, ब्याट्री, चार्जिङ स्टेसन पनि एक्स्पोमा राखिएका छन् ।

एक्स्पोमा सुजुकी ,टाटा, टोयोटा, महिन्द्रा, म्याक्सस, किया, निसान, बीवाईडी, एमजी, सिट्रोन, आइकार, हेनरी भोल्ट्स, फोर्थिङ, डेन्जा, केई, होनरी बोमा, बीएआइसी जस्ता बढी उपभोक्ताले रुचाइएका चारपांग्रे सवारीसाधनहरु प्रदर्शनमा राखिएका छन् ।।