गण्डकी र लुम्बिनीमा भारी वर्षाको सम्भावना, सतर्कता अपनाउन आग्रह

काठमाडौं– नेपाल मौसम विज्ञान विभागले आगामी असोज ९ गते शुक्रबारदेखि असोज ११ गते आइतबारसम्म गण्डकी र लुम्बिनी प्रदेशका केही स्थानमा भारीदेखि धेरै भारी वर्षाको सम्भावना रहेको जनाएको छ।

विभागका अनुसार उक्त अवधिमा मेघगर्जन, चट्याङ र हावाहुरीसहित भारीदेखि धेरै भारी वर्षा हुनसक्ने तथा एक–दुई स्थानमा अति भारी वर्षाको समेत सम्भावना रहेको छ।

भारी वर्षाका कारण नदी तथा खोलानालामा बाढी आउने, पहाडी क्षेत्रमा पहिरो तथा गेग्रान बहाव हुने र शहरी तथा तराईका क्षेत्रमा डुबानको जोखिम बढ्न सक्ने विभागले जनाएको छ।

सम्भावित विपद्का कारण जनधनको क्षति न्यूनीकरण गर्न आवश्यक सतर्कता अपनाउन तथा पूर्वतयारीका काम गर्न सम्बन्धित सबै निकाय र सर्वसाधारणलाई आग्रह गरिएको छ।

विभागले विशेषगरी जोखिमयुक्त क्षेत्रमा रहेका नागरिकलाई मौसमसम्बन्धी पूर्वसूचना तथा स्थानीय प्रशासनले जारी गर्ने सूचनामा ध्यान दिन र जोखिमयुक्त स्थानमा आवश्यक सावधानी अपनाउन अनुरोध गरेको छ।