पाल्पामा जिप दुर्घटना, ५ जना घाइते, २ को अबस्था गम्भीर

पाल्पा- पाल्पामा जिप दुर्घटना हुँदा पाँच जना घाइते भएका छन् ।

आज विहान पूर्वखोला गाउँपालिका वडा नं ६ को लाकुरीस्थित हेक्लाङ्गदेखि तानसेनतर्फ आउँदै गरेको लु १ ज २६०७ नम्बरको जिप अनियन्त्रित भई दुर्घटना भएको प्रहरीले जनाएको छ ।

जिप सडकदेखि करिब एक सय ५० मिटर तल खसेको थियो । घाइतेमध्ये दुईजनाको अबस्था गम्भीर रहेको जिल्ला प्रहरी कार्यालय पाल्पाका सूचना अधिकारी रामेश्वर त्वातीले जानकारी दिनुभयो ।

घाइते हुनेमा पूर्वखोला गाउँपालिका वडा नं ६ का ३० वर्षीय टेकबहादुर पल्ली, सोही स्थानका २८ वर्षीय पुर्ण बहादुर फाल, १९ वर्षीय चिरन्जीवी सारु, २९ वर्षीय प्रेम सिंजाली र ४६ वर्षीय पबीसरा सारु रहेको प्रहरीले जनाएको छ ।

घाइतेहरुको तानसेनस्थित युनाइटेड मिसन अस्पतालका उपचार भइरहेको पनि प्रहरीले जनाएको छ ।

हिजो मात्र पाल्पामा मलामी बोकेको बस दुर्घटना हुँदा सात जनाको घटनास्थल मै मृत्यु भएको थियो ।।