अरनिको राजमार्गस्थित साँगामा स्थानीयको अबरोध : राजमार्ग बन्द

काभ्रे- सवारी दुर्घटनामा मृत्यु भएकाका आफन्तले साँगामा आन्दोलन गर्दा साँगा तनावग्रस्त भएको छ ।

बुधबार राति काभ्रेको साँगामा सवारीले ठक्कर दिँदा एक जनाको मृत्यु भएको थियो । सवारीको ठक्करबाट बनेपा नगरपालिका वडा नं. १४ का विशाल तामाङको मृत्यु भएपछि उनका आफन्तहरु आज साँगामा आन्दोलनमा उत्रेका हुन् ।

मृतकका आफन्तहरुले बिहिबार अरनिको राजमार्ग साँगामा आन्दोलन गर्दा यात्रुहरु अलपत्र परेका छन् । अरनिको राजमार्ग अन्तर्गत साँगामा गएराति सवारी साधनले ठक्कर दिँदा तामाङको मृत्यु भएको इलाका प्रहरी कार्यालय बनेपाका प्रमुख राजन कोइरालाले जानकारी दिए ।

रातको समय भएकोले ठक्कर दिने सवारी साधनको पहिचान हुन नसकेको प्रहरी निरीक्षक कोईरालाले बताए । यद्यपी तामाङलाई ट्रिपरले ठक्कर दिएको हुनसक्ने आशंका गरिएको छ ।

ठक्कर दिने सवारी साधनको खोजी भइरहेको कोइरालाले बताए । वडा नं. १४ का स्थानीय राजमार्गमा उत्रेर आन्दोलन गर्दा अरनिको राजमार्गमा सयौं सवारी रोकिएका छन् ।।