एमालेबाट विद्या भट्टराई उपसभामुख उम्मेदवार

काठमाडौं- नेकपा (एमाले)बाट कास्कीबाट निर्वाचित सांसद विद्या भट्टराई उपसभामुख पदको उम्मेदवार हुनु भएको छ ।

भट्टराईको प्रस्तावकमा शान्ता चौधरी र समर्थक कृष्णभक्त पोखरेल रहनुभएको छ ।

एमालेले लोकतान्त्रिक समाजवादी पार्टीलाई समर्थन गर्ने भने पनि लोसपाले सत्तारुढ दललाई समर्थन गरेपछि पार्टीले आफ्नै उम्मेदवार अघि सारेको हो ।

सत्तारूढ गठबन्धन दलहरूको तर्फबाट नेपाली कांग्रेसका सचेतक पुष्पा भूसाल (गौतम) ले प्रतिनिधि सभाको उपसभामुख पदमा मनोनयन दर्ता गरिसक्नुभएको छ ।

भूसालको नेकपा (माओवादी केन्द्र) का प्रमुख सचेतक देवप्रसाद गुरूङ प्रस्तावक र नेकपा (एकीकृत समाजवादी) का लक्ष्मीकुमारी चौधरी समर्थक हुनुहुन्छ ।

बुधबारको प्रतिनिधिसभा बैठकमा सभामुख अग्निप्रसाद सापकोटाले शुक्रबार दिउँसो ३ बजे गर्ने गरी निर्वाचन मिति र समय निर्धारण गर्नुभएको थियो ।