एतिहासिक धार्मिकस्थल इच्छाकामना माइ मन्दिरको पुन: निर्माण कार्य सम्पन्न

चितवन- चितवनको इच्छाकामना गाउँपालिका-५ मा अवस्थित एतिहासिक धार्मिकस्थल इच्छाकामना माइ मन्दिरको पुन: निर्माण कार्य सम्पन्न भएको छ । ढुङ्गा र माटोले बनेको पुरानो मन्दिर जीर्ण बनेपछि जगबाटै भत्काएर पुनःनिर्माण गरिएको हो ।

पुन:निर्माण सम्पन्न भएसगैँ विधिवत रुपमा पुजाआजा गरि उद्घाटन गरि बिहिबारदेखि मन्दिरभित्रबाट पुजाआजा पनि सुरु गरिएको छ । यसअघि मन्दिर पुन:निर्माणको क्रममा भक्तजनहरुलाई मन्दिर बाहिर निर्माण गरिएको इच्छाकामना माताको प्रतिमामा पुजाआजा गर्ने व्यवस्था मिलाइएको थियो । अब भने भक्तजनहरुले भित्रैबाट पुजा गर्न पाइने छ ।

पुन:निर्माण गरिएको मन्दिरको गाउँपालिका अध्यक्ष दानबहादुर गुरुङले एक कार्यक्रमकाबीच बिहिबार उद्घाटन गर्नुभएको हो । मन्दिरको उद्घाटन गर्दै गाउँपालिका अध्यक्ष दानबहादुर गुरुङले प्रचार प्रसारमा जोड दिइने बताउनुभयो । यहाँ खानेपानीको व्यवस्था समेत भइसकेको बताउँदै उहाँले आवश्यक पुर्वाधारहरु निर्माण गर्दै जाने बताउनुभयो ।

इच्छाकामना गाउँपालिका पर्यटकीय सम्पदाले भरिपूर्ण रहेको भन्दै उहाँले प्रचारप्रसारलाई जोड दिइने बताउनुभयो । अध्यक्ष गुरुङले भन्नुभयो, “मन्दिरमा खानेपानीको व्यवस्था गरिएको छ ,जमिन संरक्षण र प्रवेशद्वारा निर्माणलाई पनि गाउँपालिकाले प्राथमिकतामा राखेको छ, गाउँपालिकाले प्रचारप्रसारमा पनि जोड दिइने छ, मनकामकामना मन्दिर आउने भक्तजन पर्यटकहरुलाई इच्छाकामनासम्म आउने ल्याउनुपर्ने छ ।”

बागमती प्रदेश, इच्छाकामना गाउँपालिका, स्थानियको श्रमदान र चन्दादाताहरुको सहयोगमा रु २ करोड ४१ लाख ८८ हजार ८१ रुपैयाँ लागतमा मन्दिर पुनः निर्माण कार्य सम्पन्न भएको इच्छाकामना सिद्धबाबा क्षेत्र संरक्षण समितिका उपाध्यक्ष यानबहादुर गुरुङले बताउनुभयो ।

कोरोना महामारी र काठको अभावका कारण मन्दिर पु निर्माण कार्य ढिला गरि सम्पन्न भएको मन्दिर समितिका अध्यक्ष रामप्रसाद बोहोराले बताउनुभयो । उहाँका अनुसार मन्दिरको वि.सं २०७५ असार ७ गते शिलान्यास गरेर काम सुरु भएको थियो । तत्कालिन बागमती प्रदेश प्रमुख अनुराधा कोइरालाले मन्दिर पुनः निर्माणको शिलान्याश गर्नुभएको थियो ।

कार्यक्रममा गाउँपालिका उपाध्यक्ष माया सिलवाल, गाउँपालिका पूर्वअध्यक्ष गीता कुमारी गुरुङ, प्रमुख प्रशासकिय अधिकृत जगतप्रसाद भुषाल, वडाध्यक्ष लगायत जनप्रतिनिधिहरु, विभिन्न राजनिति दलका प्रतिनिधि, कर्मचारी सञ्चारकर्मी लगायत स्थानियको पनि उपस्थिति रहेको थियो ।

गोरखाको सहिद लखन गाउँपालिकाको प्रसिद्ध धार्मिकस्थल मनकामना मन्दिरको आमनेसामने उत्तरमा पर्ने यस मन्दिरमा पूजाआजा गरे इच्छाएको पूरा हुने धार्मिक विश्वास छ । मनकामना माईको सात दिदीबहिनीमध्ये एक बहिनी इच्छाकामना रहेको मन्दिरका पुजारी हर्कबहादुर गुरुङले बताउनुभयो ।

मन्दिरसम्म सडक पुगेसगैँ केही बर्षयता भक्तजनहरुको आवागमनमा बृद्धि भएको पुजारी गुरुङले जानकारी दिनुभयो । प्रत्येक वर्ष मङ्सिरको ठूलो एकादशीपछि पञ्चमी तिथिमा इच्छाकामनामा ठूलो मेला लाग्छ । इच्छाकामना मन्दिर समुद्री सतहदेखि एक हजार आठ सय मिटरको उचाइमा रहेको छ ।