बागमती प्रदेशका १२ जिल्लाका २७ सामुदायिक विद्यालयसँग बस खरिद सम्झौता

मकवानपुर- दुर्गम भेगका बिद्यार्थीहरुलाई सहजरुपमा स्कुल ल्याउन बागमती प्रदेशको सामाजिक विकास मन्त्रालयले यो आर्थिक वर्षमा प्रदेशका १२ जिल्लाका २७ वटासामुदायिक विद्यालयसँग बस खरिद सम्झौता गरेको छ । मन्त्रालयले निर्धारण गरेको मापदण्डका आधारमा छनौट भएका माध्यामिक तहका बिद्यालयसँग खरिद सम्झौता गरिएको हो ।

बागमती प्रदेशकी सामाजिक विकास मन्त्री कुमारी मोक्तानको प्रमुख आतिथ्यतामा बिद्यालय ब्यवस्थापन समितीका अध्यक्ष र शिक्षा विकास निर्देशनालयका प्रमुख दिपेन्द्र सुबेदीले सम्झौतामा हस्ताक्षर गरेका थिए । सिन्धुली बाहेकका १२ जिल्लाका २७ वटा सामुदायिक विद्यालयले बस खरीदका लागी सम्झौता गरेका हुन् ।

कार्यक्रममा सामाजिक विकास मन्त्री मोक्तानले बिद्यालय बस सञ्चालनबाट बिद्यार्थीहरु सहजै स्कुल आउने वातावरण बनेको बताउनुभयो । यो कार्यक्रमले सामुदायिक विद्यालयमा बिद्यार्थीको आकर्षण बढेको छ ।

सामुदायिक विद्यालय मर्ज हुँदा बिद्यालय आउन घण्टौ हिड्नुपर्ने बालबालिकाका लागि स्कुल बस सहयोगी हुने मन्त्री मोक्तानले दाबी गर्नुभयो । विद्यालयको शैक्षिक गुणस्तर बृद्धि हुनुका साथै सबै सामुदायिक विद्यालयमा विद्यार्थीको सहभागिता समेत बढ्ने मन्त्री मोक्तानले विश्वास व्यक्त गर्नुभयो ।

बस खरिदका लागि प्रति बिद्यालय २५ लाख रुपैयाँ बजेट छुट्याईएको छ । बागमती प्रदेश सरकारको अनुदान सहयोगमा हाल ७० वटा सामुदायिक विद्यालयले बस सञ्चालन गरिरहेका छन् ।