हेटौंडामा भएको विभिन्न दुर्घटनामा ३ जनाको मृत्यु

हेटौडा – मकवानपुरको हेटौंडा उपमहानगरपालिका –१६ पानीस्वारामा ट्याक्टर दुर्घटना हुँदा दुई जनाको मृत्यु भएको छ ।
मृत्यु हुनेमा बारा निजगढ नगरपालिका–१३ का २६ वर्षीय चालक डिलम थिङ र ट्याक्टरमा सवार हेटौंडा–१६ पानीस्वाराका जित बहादुर थिङ रहेका छन् । आइतबार ट्याक्टर ब्याक गर्ने क्रममा मधेश प्रदेश ०३–००१ त ६९८७ नम्बरको ट्याक्टर अनियन्त्रित भई भीरबाट अन्दाजी ३ सय मिटर तल खसेको प्रहरीले जनाएको छ । मकवानपुरका प्रहरी प्रवक्ता लक्ष्मी भण्डारीका अनुसार उनीहरुको घटनास्थलमै मृत्यु भएको हो । घटनास्थल बारा र मकवानपुर जिल्लाको सिमानामा पर्दछ ।
यता, इन्द्रसरोवर गाउँपालिका—५ कुवामा आइतबार बसबाट ओर्लने क्रममा लडेर ७० वर्षकी कान्छीमाया घलानको मृत्यु भएको छ । काठमाडौंबाट चखेल आउँदै गरेको ७२७२ नंम्बरको बसबाट झर्ने क्रममा बसको टायरले ठक्कर दिदा घलान गम्भिर घाइते हुनुभएको थियो । उहाँको बि एण्ड बि अस्पतालमा उपचारको क्रममा मृत्यु भएको जिल्ला प्रहरी कार्यालय मकवानपुरले जनाएको छ । प्रहरीले बसका चालक राजकुमार दोङलाई नियन्त्रणमा लिएको छ । ।