नेपाल भ्रमणमा विदेशी पर्यटकको चासो बढ्दै

काठमाडौं- कोरोना महामारीकै बीचमा पनि विदेशी पर्यटकहरूले नेपाल भ्रमणमा आउने इच्छा देखाएका छन् ।

सरकारले आगामी कात्तिक १ गतेबाट विदेशी पर्यटकहरूलाई नेपाल खुला गरेसँगै बुकिङका लागि धमाधम सोधपुछ शुरु भएको पर्यटन व्यवसायीहरु बताउँछन। अन्तर्राष्ट्रिय उडान खुलेसँगै पर्यटकहरूले नेपाल आउने मनसाय राखेर बुकिङसमेत सुरु गरेका छन।

टिकट र प्याकेज बुकिङ भइरहे पनि ‘अनअराइभल’ भिसा बन्द हुँदा भिसा लगाउन सम्बन्धित मुलुकको नेपाली दूतावास धाउनुपर्ने प्रावधानका कारण केही असहज भएको व्यबसायीहरुको भनाइ छ ।

विगतमा पर्यटकहरूलाई ‘अनअराइभल भिसा’ दिने गरिएकोमा कोरोना प्रकोपसँगै गत फागुनदेखि सबै मुलुकका लागि अनअराइभल भिसा बन्द भएका कारण असजिलो भएको एनविएम ट्राभल्सका अध्यक्ष शुर्दशन नेपालको भनाइ छ ।

सरकारले अहिले विदेशीहरूलाई अनिवार्य रुपमा ७ दिन क्वारेन्टाइनमा बस्नु पर्ने व्यवस्था गरेकामा त्यसलाई तीन दिनमा झार्नुपर्ने सुझाब पर्यटन व्यवसायीहरुको छ ।

कोभिड कहरकैबीच पनि युरोप, अमेरिका, भारत र चीनबाट पर्यटकहरु नेपाल आउन विशेष चासो देखाएको व्यवसायीहरु बताउँछन ।

सरकारले बाह्य उडानसँगै असोज १ गतेदेखि आन्तरिक उडान र लामो दूरीको सार्वजनिक यातायात पनि सञ्चालनमा ल्याएको छ।

त्यसैगरी होटल तथा रेस्टुराँका साथै ट्रेकिङ र पर्वतीय पर्यटन क्षेत्र पनि खुला भएकाले पयर्टकहरू नेपालप्रति आकर्षित भएका छन ।।